Bas múftı juqpaly indetten qaıtys bolǵan marqumnyń týystaryna kóńil aıtty
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly juqpaly indetten qaıtys bolǵan marqumnyń týǵan-týystaryna kóńil aıtý jedelhatyn joldady.
«Ózimniń jáne Qazaqstan musylmandary dinı basqarmasynyń ujymy atynan qaıǵylaryńyzǵa ortaqtasa otyryp, kóńil aıtamyn. Alla Taǵala marqumdy meıirimine bólep, aldynan jarylqasyn. Imany salamat bolǵaı. Paıǵambarymyz Muhammed (oǵan Allanyń salaýaty men sálemi bolsyn) bir hadısinde juqpaly indet kezinde sabyr saqtap, tek Allaǵa táýekel etip, taǵdyrǵa ıman etken musylmanǵa sheıittiń saýabyndaı saýap jazylatynyn aıtqan. Marqumǵa osyndaı saýap jazylýyn Jaratqannan úmit etemiz. Qazanyń arty qaıyrly bolǵaı. Ámın» delingen Bas múftıdiń kóńil aıtý jedelhatynda.
Aıta ketsek, elimizde juqpaly indetten 64 jastaǵy Aqmola oblysynyń turǵyny qaıtys bolǵany týraly qaraly habar tarady. Alla Taǵala halqymyzǵa amandyq, jurtymyzǵa tynyshtyq násip etip, elimiz pen jerimizdi óz panasynda saqtaǵaı.
