Bas múftı Jetisý aýdany jamaǵatyna ýaǵyz aıtty (FOTO)

Búgin Almatydaǵy «Ábý Hanıfa» medresesinde tálim alyp jatqan shákirtterge dáris oqyǵan Bas múftı Naýryzbaı qajy Taǵanuly ıgi kezdesýden keıin Jetisý aýdany jamaǵatyna ýaǵyz aıtty.

Besin namazyn óteý úshin aýdandyq «Ál-Mádına» meshitine jınalǵan qaýymǵa nasıhatyn jetkizgen QMDB Tóraǵasy Naýryzbaı qajy Taǵanuly: «Allaǵa shúkir, qazir elimizde salynyp jatqan meshit sany jyl sanap artyp keledi. Memleket Qazaqstan musylmandary dinı basqarmasynyń jamaǵatty jaqsylyqqa úndep, jat aǵymnan saqtandyrý sharalaryna qoldaý kórsetip keledi. Paıǵambarymyz (oǵan Allanyń salaýaty men sálemi bolsyn) bir ósıetinde musylman úmbeti tek jaqsy ister úshin birigip, bir-birine kómekshi bolatynyn aıtqan. Endigi maqsat, Alla elshisi aıtqandaı, ózara yntymaǵymyzdy arttyryp, ıgi de saýapty sharalardyń basy-qasynda bolyp, jumyla jumys isteý. Osynaý ortaq maqsattarymyzdy birlese júzege asyrýǵa shaqyramyn», – dep atap ótti.

Kezdesý sońynda Bas múftı jamaǵatpen suhbattasyp, suraqtaryna jaýap berdi.

​