BAS MÚFTI JER SILKINISINE BAILANYSTY DUǴA JASADY (FOTO)

Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Astanadaǵy «Áziret Sultan» meshitinde Almatydaǵy jer silkinisine baılanysty Quran Hatym sharasyna qatysyp, el men jerdiń amandyǵy úshin duǵa jasady.

«Ýa, Jaratýshymyz Alla Taǵala! Osy oqylǵan qasıetti «Quran» aıattarynyń nurymenen halqymyzdy, elimizdi, jerimizdi nurǵa bóleı gór. Halqymyzdy tabıǵı apattardan, zilzaladan, topan sýdan, órtten, keselden, túrli indetterden aman saqtaı kór! Almaty halqyna Óziń jeńildik, sabyr násip et! Ýa, Alla Taǵalam! Bizdi aldymyzdan, artymyzdan, oń jaǵymyzdan, sol jaǵymyzdan, tóbemizden (aspannan) jáne jer astynan aıaq-asty keletin barlyq qaýip-qaterden, báleden Óziń saqtaı gór! Ámın» – dedi Naýryzbaı qajy Taǵanuly.

Aıta keteıik, búgin Almatyda saǵat 11:00 shamasynda jer silkinip, turǵyndardy ábigerge saldy. Alla Taǵaladan almatylyq aǵaıynnyń amandyǵyn surap, Óziniń qorǵanynda bolýyn tileımiz.

​