Bas múftı jańa meshit qurylysymen tanysty (FOTO)

QMDB Tóraǵasy, Bas múftı Naýryzbaı qajy Taǵanuly elordanyń Esil aýdanynda salynyp jatqan jańa meshittiń qurylysymen tanysty.

Elbasy Nursultan Nazarbaevtyń tapsyrmasyna sáıkes salynyp jatqan qulshylyq ordasy elimizdegi ǵana emes, Ortalyq Azııadaǵy eń úlken meshit bolmaq. Meshittiń jalpy kólemi 57 myń sharshy metrdi quraıdy. Saıabaq ortasynda ornalasady. Munaralary – 130 metr, al kúmbeziniń bıiktigi 88,2 metrden asady dep josparlanýda. 30 myń adamǵa eseptelgen meshittiń búginde 30 paıyzy aıaqtalǵan. Meshit qurylysy 2021 jyly tolyqtaı aıaqtalady dep kútilýde.

Qurylys júrgizýshi mekeme basshylarynyń aıtýynsha, mundaı saıabaq ortasynda ornalasqan iri meshit kesheniniń álemde balamasy joq. Keshenniń astynda avtoturaq, meıramhanalar, dúkender, murajaı ornalaspaq.

Naýryzbaı qajy Taǵanuly meshit qurylysyn júrgizip jatqan mekeme basshylarymen júzdesip, jumys barysymen tanysty.

– Alla qalasa, bul jerde sáýletti meshit turǵyzylady. Elbasy aıtqandaı, bul musylman qaýymynyń maqtanyshyna aınalatyn meshit bolmaq. Sol kúnge jetýdi Alla násip qylsyn! – degen Bas múftı meshit qurylysyna atsalysyp jatqan barsha azamattarǵa Alladan bereket tilep, arnaıy duǵa jasady.

​