BAS MÚFTI IaSAÝI INSTITÝTYNYŃ ALǴAShQY TÚLEKTERINE KÝÁLIK TABYSTADY

Búgin Túrkistan qalasynda Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly jańadan boı kótergen «Qoja Ahmet Iasaýı» atyndaǵy Respýblıkalyq ımamdardyń bilimin jetildirý ıslam ınstıtýtynyń alǵashqy túlekterine kýálik tabystady.

Aıta keteıik, atalǵan bilim ordasy 2026 jyldyń 17 qańtarynda esigin aıqara ashqan bolatyn. Rýhanı astanadaǵy dinı bilim berý júıesin jańa deńgeıge kóterýdi maqsat etken ınstıtýt qasıetti Túrkistan óńirindegi 778 meshit pen 1420 din qyzmetkeriniń kásibı biliktiligin arttyrýǵa baǵyttalǵan. Búgin osy ıgi bastamanyń alǵashqy nátıjesi kórinis tapty.

«Ardaqty Paıǵambarymyz (oǵan Allanyń salaýaty men sálemi bolsyn): “Bilim izdeý – árbir musylmanǵa paryz”, – degen. Sizder segiz aptalyq, ıaǵnı 240 saǵattyq qarqyndy oqý barysynda Quran men tájýıdten bastap, aqıda men fıqh ilimderin, sondaı-aq sheshendik óner men din psıhologııasyn tereń meńgerdińizder. Bul – el ıgiligi úshin qyzmet etetin sapaly kadr qalyptastyrýdaǵy mańyzdy qadam», – dedi Naýryzbaı qajy Taǵanuly.

Instıtýt qabyrǵasynda dinı bilimmen qatar «Babalar izimen» jáne «Darhan dala» jobalary aıasynda Arystan bab, Qoja Ahmet Iasaýı keseneleri men kóne Otyrar shaharyna jasalǵan zııarattar ımamdardyń rýhanı tanymyn keńeıtýge yqpal etti.

Is-shara sońynda oqýyn sátti aıaqtaǵan 26 ımamǵa arnaıy kýálikter tabystaldy. QMDB Tóraǵasy túlekterdi quttyqtap, dáris bergen ustazdarǵa, ınstıtýt basshylyǵyna jáne ıgi iske úles qosqan barsha azamattarǵa alǵys bildirdi.

​