Bas múftı ushaq apatynan qaza bolǵan azamattardyń otbasyna kóńil aıtty

Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz Almaty mańynda ushaq apatynan qaza tapqan azamattardyń otbasyna kóńil aıtty.

«Almaty halyqaralyq áýejaıy mańynda bolǵan qaıǵyly habardy aýyr kúızelispen qabyldadym. Ózimniń jáne Qazaqstan musylmandary dinı basqarmasy ujymy atynan sizderge, aǵaıyn-týystaryńyzǵa, barsha halyqqa kóńil aıtamyn. Qaıǵyly jaǵdaı bizdiń de janymyzǵa batty, júregimizdi aýyrtty.

Jaratýshy Iemiz marqumdardy óz meıirimine bólesin dep tileımiz. Jaraqat alǵan jandarǵa Jaratqannan shıpa suraımyz. Alla Taǵala elimizdi, jerimizdi tosynnan keletin túrli apattan saqtasyn. El aman, jurt tynysh bolǵaı. Ámın!» delingen Bas múftıdiń kóńil aıtý jedelhatynda.

Aıta keteıik, búgin tańda Almatydan Nur-Sultanǵa baǵyt alǵan «Bek Eır» áýe kompanııasynyń №Z2100 reısi ushý kezinde apatqa ushyrady.