BAS MÚFTI: ULYS OŃ BOLSYN!

Ardaqty aǵaıyn!

Barshańyzdy ulystyń uly kúni – Naýryz meıramymen quttyqtaımyn. Ulys oń bolsyn, aq mol bolsyn! Ár shańyraqqa shattyq pen qýanysh, baq pen bereke tileımin. Alla Taǵala qarııalarymyzǵa qýat, jastarymyzǵa jiger, halqymyzǵa qashan da yntymaq, tatýlyq násip etkeı!

Shýaqty kóktemniń kelgenin bildiretin áz-Naýryz – joraly jurtymyzdyń ulttyq merekesi. Naýryz kúnderi kórshi-qolań, quda-jekjat, aǵaıyn-týysty aralap, aman-saýlyq surasyp, máre-sáre kúı keshemiz. Er kisiler tós qaǵystyryp, bir-birimizge izgi tilekterimizdi aıtamyz. Renjiskender tatýlasyp, keshirim jolyn ustanady. Óıtkeni, týysqandy zııarat etý, renjisken kisilermen tatýlasý – kúlli paıǵambarlar salǵan sara jol.

Naýryz – qaıyrymdylyqtyń merekesi. Meıramda jomart jandar jetim men jesirdi jabyrqap, kómekke muqtaj jandardy qýanyshqa bóleıdi. Adamzattyń ardaqtysy Muhammed paıǵambarymyz (oǵan Allanyń salaýaty men sálemi bolsyn) aıtqandaı, eń jaqsy adam – aınala-tóńiregine shýaǵyn shashyp, paıdasyn tıgizip júretin pende. Osynaý áz-Naýryzda izgilikke úndeıtin árbir amaldyń, ulttyq ádet-ǵuryptardyń urpaqqa berer tárbıesi men taǵylymy mol.

Kúlli túrki jurtynyń tól toıy – Naýryz elimizdegi túrli ultty yntymaqqa uıystyryp, meıirbandyqqa úndep keledi. Alla Taǵala halqymyzǵa amandyq, jurtymyzǵa tynyshtyq bergeı! Táýelsizdigimiz baıandy bolǵaı! Ámın!

Serikbaı qajy ORAZ,
Qazaqstan musylmandary dinı basqarmasynyń tóraǵasy, Bas múftı