Bas múftı: Uly mıssııamyzǵa uqypty bolaıyq (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Pavlodar oblysynda óńir ımamdarymen kezdesýde osylaı dedi.

Oblystyq «Máshhúr Júsip» meshitinde «Bilim turǵan jerde ıman turady» taqyrybynda ótken kezdesýde QMDB Tóraǵasy Naýryzbaı qajy Taǵanuly: «Qadirli baýyrlarym! Alla Taǵala «Álı-Imran» súresiniń 110-aıatynda: «Sender eldi jaqsylyqqa shaqyryp, jamandyqtan tyıý úshin shyǵarylǵan qaıyrly úmbetsińder», – deıdi. Eldi jaqsylyqqa shaqyratyn birden-bir ıslamdyq birlestik – Qazaqstan musylmandary dinı basqarmasy. Dinge qyzmet – Paıǵambar joly. Bul – uly mıssııa. Biz, din qyzmetkerleri osy uly mıssııany jalǵastyrýshy tulǵalarmyz. Endigi maqsat, uly mıssııamyzǵa uqypty bolyp, Paıǵambarymyz (oǵan Allanyń salaýaty men sálemi bolsyn) ósıet etkendeı, osy jumysymyzdy jaqsy kórip, dinge, elge qyzmet etýde tııanaqtylyq tanytý. Ár isimizdi kásibı túrde oryndaýǵa kiriseıik. Ortaq maqsat isinde jumyla jumys isteıik», – dep atap ótti.

Kezdesý sońy suraq-jaýapqa jalǵasyp, erkin suhbatqa ulasty. Júzdesýden keıin eldiń ıgiligi úshin duǵa jasaldy.