Bas múftı Túrkistan oblysyna keldi (FOTO)

Jumys saparyn Túrkistan oblysynyń Túlkibas aýdanynan bastaǵan QMDB Tóraǵasy, Bas múftı Naýryzbaı qajy Taǵanuly ákimdiktiń májilis zalynda arnaıy kezdesý ótkizdi.

Jıynǵa Túlkibas aýdanynyń aýdan ákimi Nurbol Turashbekov, jergilikti ardagerler keńesiniń tóraǵalary, máslıhat depýtattary, aýdan aqsaqaldary men ımamdar qatysty. Nurbol Ábdisattaruly Bas múftıdi jańa qyzmetimen quttyqtap, tabys tiledi.

«Biz árdaıym aýdanymyzdyń azamattarymen maqtanamyz. Olarǵa qashan da tilektespiz. Ózińiz basqaryp otyrǵan Dinı basqarma jumysyna tabys tileımin» dep túıindedi sózin aýdan ákimi.

Bas múftı kezdesýde óziniń balalyq shaǵy, alǵashqy eńbek jolyn bastaǵan ólkege rızashylyǵyn jaýdyra kele Alashtyń ardaqty azamaty Álıhan Bókeıhannyń «Qazaq balasy birigip, tize qosyp is qylsa, halyqtyq maqsat sonda oryndalady. Bostandyqqa aparatyn jalǵyz jol ulttyq yntymaq qana» degen ulaǵatty sózin tilge tıek etip, buqarany birlikke shaqyrdy. «Biz de din ókili retinde tynyshtyq pen tatýlyqty, yntymyq pen birlikti nasıhattaýymyz qajet» dedi Bas múftı.

Budan keıin minbege kóterilgen aýdan aqsaqaldary men ımamdar usynystaryn ortaǵa salyp, aqjarma tilegin jetkizdi. Kezdesý sońynda aýdan ákimi jerlesteri atynan Naýryzbaı qajy Taǵanulynyń ıyǵyna shapan jaýyp, qurmet kórsetti.