Bas múftı Túrki akademııasy prezıdentimen birqatar máseleni talqylady (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly elordada Halyqaralyq túrki akademııasynyń prezıdenti, «Egemen Qazaqstan» respýblıkalyq gazeti» aktsıonerlik qoǵamynyń Basqarma tóraǵasy Darhan Qydyrálimen suhbattasty.

Darhan Qýandyquly Bas múftıdi jańa qyzmetimen quttyqtap, izgi tilegin bildirdi.

Kezdesýde qazaqtyń din qaıratkerleri men tarıhı meshitter, kıeli oryndar men salt-dástúr sabaqtastyǵy týraly tanymdyq kitap pen maqala toptamasyn shyǵarý máselesi talqylandy. Sonymen qatar, Dinı basqarmanyń uıytqy bolýymen tarıhı-dinı kitaphana ashý bastamasy sóz boldy.

Múftııattyń jumysy jaıly jyly pikirin bildirgen Darhan Qydyráli qasıetti ramazan aıynda «Egemen Qazaqstan» gazetinen arnaıy aıdar ashyp, tanymdyq materıaldarǵa oryn beretinin jetkizdi.

«Rasynda, din men dástúr qundylyqtaryn nasıhattaý – barshamyzdyń asyl boryshymyz. Bul rette halqymyzdy rýhanı qundylyqtarmen sýsyndatyp kele jatqan sizge, «Egemen Qazaqstan» gazetiniń ujymyna aıryqsha alǵysymdy bilderimen. Alla razy bolsyn!» dedi Bas múftı Naýryzbaı qajy Taǵanuly.

Basqosý sońynda D.Qýandyquly Halyqaralyq túrki akademııasy ázirlegen tarıhı kitaptar men avtorlyq eńbekterin múftııat kitaphanasyna syılady. Óz kezeginde QMDB Tóraǵasy N.Taǵanuly qonaqqa múftııattyń káde-syıyn berdi.