Bas múftı tóraǵalyǵymen onlaın Tóralqa májilisi ótti (FOTO)

Búgin elordada Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasynyń Ramazan aıy qarsańynda dástúrli Tóralqa májilisi ótti.

Onlaın májiliske naıb múftı Ershat Ońǵarov, QMDB Apparat basshysy Ǵylymbek Májıev, Ǵulamalar keńesiniń músheleri, QMDB bólim meńgerýshileri men oblys jáne respýblıkalyq mańyzy bar qalalardyń bas ımamdary qatysty.

Onlaın májiliske qosylǵan Aqparat jáne qoǵamdyq damý mınıstri Marat Ázilhanov tótenshe jaǵdaı kezinde din qyzmetkerleriniń qaıyrymdylyq, onlaın nasıhat aıtý, halyqty birlik pen ımandylyqqa shaqyrý baǵyty boıynsha atqaryp kele jatqan jumystary jaıly oń pikirin bildirdi. Sonymen qatar, QMDB Ǵulamalar keńesi ázirlegen as berý mádenıeti, zıratty zııarat etýdiń tártibi syndy birqatar qujattardyń qoǵam úshin mańyzdylyǵyn atap ótti.

Onlaın májiliste QMDB Sharıǵat jáne pátýa bólimi meńgerýshisiniń orynbasary Hasan Amanqulov Ramazan aıynda beriletin pidııa, pitir sadaqasy men zeket mólsherin anyqtaýdyń mańyzy jaıynda baıandama jasady. Sonymen qatar Tóralaqa májilisinde oraza kestesin bekitý, tótenshe jaǵdaı kezinde zeket pen pitir sadaqasyn berý tártibin ońtaılandyrý, t.b. máseleler talqylandy.

Oblys, qala bas ımamdary Bas múftımen tikeleı qosynda suhbattasyp, orazaǵa daıyndyq jumystary jaıly áńgimelesti. Onlaın májilis sońynda QMDB Tóraǵasy Naýryzbaı qajy Taǵanuly Ortalyq apparat qyzmetkerleri men óńir bas ımamdaryna naqty nusqamalar berdi.

Aıta ketsek, bıyl Ramazan aıy 24 sáýirde bastalady. Bul týraly Bas múftı N.Taǵanuly Prezıdent janyndaǵy Ortalyq kommýnıkatsııalar qyzmetinde tikeleı Efırde ótken brıfıngte málimdegen bolatyn.