BAS MÚFTI «TÓLEBAI» MEShITINDE ÝAǴYZ AITTY (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly elordadaǵy «Tólebaı» meshitinde taraýyq namazyna qatysyp, jamaǵatqa ýaǵyz aıtty. 

«Ramazan aıynda baýyrmaldyqty arttyrýdyń mańyzy» taqyrybynda nasıhat aıtqan Bas múftı adamdar arasyndaǵy baýyrmaldyqtyń mańyzyna toqtaldy. 

«Adam balasyna ıman nyǵmeti berilgennen keıin, onyń júregine ıman etken ózge adamdarǵa degen súıispenshilik sezimi de qosa beriledi. Kimniń júreginde ózge musylmandarǵa degen shynaıy súıispenshilik, baýyrmaldyq sezimi bolsa, onda ol tolyqtaı ıman etkenniń kórinisi. Óıtkeni ardaqty Paıǵambarymyz (oǵan Allanyń salaýaty men sálemi bolsyn) hadısinde: «Ózi úshin jaqsy kórgenin baýyry úshin de jaqsy kórmeıinshe eshqaısylaryń tolyq ıman etken bolyp sanalmaısyńdar», – degen (ımam Buharı).

Malık ıbn Dınar (ony Alla rahymyna bólesin): «Eki adam boılarynda bir-birine uqsaıtyn sıpattary bolǵan jaǵdaıda ǵana dos bolady. Bul turǵyda adamdardy qustarǵa teńeýge bolady. Sebebi, birdeı bolǵan eki qus qana birge júre alady», – dep aıtqan. Muqaǵalı aqyn buny:

Qyrǵı joldas bola almaıdy keptermen,

Sebebi ol kepter etin jep kórgen.

Qoı qoralas bola almaıdy qasqyrmen,

Qasqyrdan ol kóresini kóp kórgen, – dep óleń joldarymen jetkizgen.  

Musylman adam osy baýyrmaldyq nyǵmetti qadir tutyp, ózgelermen qarym-qatynasynyń nyǵaıýyna alyp keletin isterge amal etýi qajet. Ásirese qasıetti Ramazan aıynda osyndaı amaldarǵa mán berýimizdiń mańyzy úlken» dedi Naýryzbaı qajy Taǵanuly.

Budan keıin QMDB Tóraǵasy «Tólebaı» meshitiniń jamaǵatymen birge taraýyq namazyn oqyp, el amandyǵy men tynyshtyǵy úshin duǵa jasady.  

​