Bas múftı: Táýelsizdigimizdiń tuǵyry bıik bolǵaı!

Qurmetti otandastar, baýyrlar!

Barshańyzdy mereıli merekemiz – Táýelsizdik kúnimen quttyqtaımyn! Qasterli merekemiz qutty bolsyn! Ár januıaǵa baq pen bereke, yrys pen yntymaq, myqty densaýlyq, Allanyń amandyǵy men tynyshtyǵyn tileımin.

Táýelsizdik – qasıetti uǵym, qasterli sóz. Ózimizge tıesili ıgilikter men nyǵmetterdiń barshasyna áýeli Allanyń, sodan keıin táýelsizdigimizdiń arqasynda qol jetkizdik. Egemendik eldigimizdiń eńsesin kóterdi.

Halqymyzdyń tarıhı taǵdyrly kóshinde san qıly syndarly sátter men qaýipti synaqtar boldy. Allaǵa shúkir, aýmaly-tókpeli zaman artta qaldy. Azattyqtyń aq tańy atyp, Táýelsizdiktiń tuǵyry bekidi. Dinimiz ben dástúrimizdi, saltymyz ben sanamyzdy qaıta jańǵyrtý jolynda aýqymdy jobalar iske asýda. Bul tarıhı bastamalar halqymyzdyń, musylman qaýymynyń rýhanı ómirine úlken serpin berýde.

Endeshe, táýelsizdikti saqtap, babalar amanatyn aqtap, elimiz ben eldigimizdi keler urpaqqa uly mura etip qaldyrý – barsha azamattyń asyl boryshy, myzǵymas mindeti bolýǵa tıis. Táýelsizdikke úles – barlyq múddeden bıik kúres.

Táýelsiz eldiń azamattary úshin aýadaı qajet minezderdiń biri – tatýlyq pen baýyrmaldyq.

Alla Taǵala qasıetti Quranda: «Allanyń jibinen myqtap ustańdar, ajyrap bólinbeńder» («Álı-Imran» súresi, 103-aıat), – dep buıyrǵan.

Táýelsizdik yntymaqqa uıysqan elde ǵana baıandy bolmaq. Yntymaǵy artqan eldiń yrysy men berekesi molaıady.

Alla Taǵala elimizdiń amandyǵyn, jerimizdiń tynyshtyǵyn baıandy etkeı! Táýelsizdigimizdiń tuǵyry bıik bolǵaı. Ámın!

Mereke qutty bolsyn, aǵaıyn! 

 Serikbaı qajy ORAZ,
Qazaqstan musylmandary dinı basqarmasynyń tóraǵasy, Bas múftı