Bas múftı tarıhı eńbekterdiń tusaýkeserine qatysty (FOTO)

Astanada Qazaqstan Respýblıkasynyń Tuńǵysh Prezıdenti – Elbasynyń kitaphanasynda «Jamıǵat-at taýarıh» jáne «Zıkzal» kitaptarynyń tusaýkeser rásimi ótti.

Saltanatty sharaǵa «Nur Otan» partııasy Tóraǵasynyń birinshi orynbasary Máýlen Áshimbaev, Qoǵamdyq damý vıtse-mınıstri Berik Aryn, Halyqaralyq túrki akademııasynyń prezıdenti Darhan Qydyráli, L.N. Gýmılev atyndaǵy Eýrazııa ulttyq ýnıversıtetiniń rektory Erlan Sydyqov, Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz, Parlament depýtattary, qoǵam qaıratkerleri, zııaly qaýym ókilderi men ǵalymdar qatysty.

Atalǵan eńbekterdi Elbasynyń «Rýhanı jańǵyrý» memlekettik baǵdarlamasynyń aıasynda Halyqaralyq Túrki akademııasy basyp shyǵardy.

«Rashıd ad-dınniń «Jamıǵ at-taýarıh» eńbeginiń alǵash ret qazaq tiline aýdarylýy – tarıhı oqıǵa. Bekasyl Bıbolatulynyń «Zıkzal» kitabynyń da ana tilimizge tárjimalanýy rýhanı ómirimizdegi eleýli sátterdiń biri», – dep atap ótti «Nur Otan» partııasy Tóraǵasynyń Birinshi orynbasary Máýlen Áshimbaev.

Eńbekti parsy, kóne shaǵataı tilderinen aýdarǵan – Qazaqstan musylmandary dinı basqarmasy Ǵulamalar keńesiniń múshesi, arab, parsy tiliniń mamany Záripbaı Jumanuly.

Záripbaı Jumanulyna eleýli eńbegi úshin Túrki akademııasynyń kúmis medali tabystaldy.

​