BAS MÚFTI SÝ TASQYNYNAN ZARDAP ShEKKEN OTBASYLARǴA BASPANA KILTIN TABYSTADY
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Qostanaı óńirine jumys sapary barysynda sý tasqynynan zardap shekken otbasylarǵa baspana kiltin tabys etti.
Arqalyq qalasyndaǵy Dala ólkesi tarıhy oblystyq murajaıynda ótken saltanatty rásimde Bas múftı «Zeket jáne qaıyrymdylyq» qorynyń «El úlesi – páterge» jobasy aıasynda baspanaly bolǵan 7 otbasyny quttyqtap, izgi tilegin jetkizdi.
«Ózderińizge belgili bıylǵy kóktem elimiz úshin ońaı bolmady. «Taý men tasty sel buzar, adamzatty sóz buzar» demekshi, sý tasqyny kóptegen eldimekenderdi, qalalardy basyp, myńdaǵan otbasy baspanasyz dalada qaldy. Úısiz qalǵan árbir qazaqtyń qaıǵysy – bárimizge ortaq. «Qazany birdiń qaıǵysy bir» deıdi dana halqymyz. Bir eldiń sýyn iship, otyna jylynyp otyrǵan bizder, sizdermen árqashan birgemiz.
Alla Taǵala qıyndyq sońynan jeńildik berip, qaıǵy sońyn qýanyshqa ulastyryp otyr. Birte-birte úıin sý basqan baýyrlarymyz jańa baspanalaryna qol jetkize jatar. Al bizdiń búgin sizderdi quttyqtap, qýanyshqa ortaqtasyp kelip jatqan jaıymyz bar. Taǵy bir erekshe atap ótetini, osy otbasylar arasynda Qazaqstan musylmandary dinı basqarmasy Áıel-qyzdar sektorynyń uıymdastyrýymen osy aıdyń basynda ótkizilgen qaıyrymdylyq jármeńkesiniń nátıjesinde «Qıyndyqta el birge» jobasy aıasynda Arqalyq qalasynda sý tasqynynan zardap shekken kópbalaly otbasyǵa páter berilip otyr» dedi Naýryzbaı qajy Taǵanuly.
Aıta keteıik, Dáýlet Dúısenbaevtyń otbasyna páter QMDB Áıel-qyzdar sektorynyń uıytqy bolýymen qaıyrymdylyq jármeńkesinen túsken qarajatqa satyp alyndy. Dáýlet Dúısenbaev Arqalyq qalasynyń turǵyny, ózi Astanada jumys isteıdi jáne jubaıy Elmıra bes balanyń kútimimen úı sharýasynda. Sondaı-aq baspanaly bolǵan jeti otbasyǵa Áıel-qyzdar sektory 100 tósek-oryn jabdyǵyn tartý etti.
