BAS MÚFTI STENFORD ÝNIVERSITETINDEGI MUSYLMAN QAÝYMYMEN JUMYSQA JAÝAPTY ÓKILMEN KEZDESTI
AQSh-qa jasaǵan jumys sapary aıasynda QMDB Tóraǵasy, Bas múftı Naýryzbaı qajy Taǵanuly álemdegi eń bedeldi joǵary oqý oryndarynyń biri StEnford ýnıversıteti janyndaǵy Dinı jáne rýhanı ómir keńsesinde qyzmet atqaratyn, ýnıversıtettegi musylman qaýymymen jumysqa jaýapty ókil, Quran oqýdyń on qyraǵaty boıynsha ıdjaza ıesi Ámına Dárýısh (Dr. Amina Darwish) hanymmen kezdesti.
Kezdesý barysynda joǵary oqý oryndaryndaǵy rýhanı tárbıe, stýdent jastarmen júıeli jumys júrgizý, ýnıversıtet keńistigindegi dinı jáne mádenı ártúrlilikti úılestirý, sondaı-aq musylman stýdentterine qoldaý kórsetý máseleleri talqylandy. Taraptar akademııalyq ortada qundylyqtyq tárbıe men rýhanı turaqtylyqty qatar damytý mańyzyn atap ótti.
Bas múftı óz sózinde jastardyń dinı saýatyn arttyrý, dástúrli ıslam qundylyqtaryn zamanaýı bilim keńistiginde durys túsindirý jáne rýhanı ımmýnıtet qalyptastyrý mańyzdy mindet ekenin jetkizdi. Sonymen qatar bilim men rýhanııattyń úılesýi qoǵamdaǵy kelisim men ózara qurmetti nyǵaıtatynyn atap ótti.
Ámına Dárýısh ýnıversıtet qabyrǵasyndaǵy musylman stýdenttermen rýhanı jumys baǵyty boıynsha atqarylyp jatqan jumystarmen bólisip, stýdentterge rýhanı keńes berý, qaýymdastyq qalyptastyrý, qoǵammen baılanys jobalary jáne konfessııaaralyq dıalog salalaryndaǵy tájirıbesin baıandady. Jastarmen jáne stýdenttermen on jyldan astam ýaqyt boıy jumys istep kele jatqan maman retinde ártúrli mádenı ortadan shyqqan musylman jastaryn biriktirýdiń mańyzyn atap ótti.
Kezdesý aıasynda Bas múftı StEnford ýnıversıtetiniń kampýsyn aralap, oqý ordasyndaǵy stýdenttik orta jáne ınfraqurylymmen tanysty. Sondaı-aq Shaǵban aıy men Barat túnine oraı oraza ustaǵan stýdentter men ýnıversıtet qyzmetkerleriniń qatysýymen ótken aýyzasharǵa qatysty.
Kezdesý qorytyndysynda taraptar jastarǵa rýhanı qoldaý kórsetý, bilim berý ortasyndaǵy qundylyqtyq tárbıeni kúsheıtý jáne tájirıbe almasý baǵytyndaǵy yqpaldastyqty damytýǵa ýaǵdalasty.
