Bas múftı Smanovtar otbasyna kóńil aıtty

Qazaqstan musylmandary dinı basqarmasynyń tóraǵasy Naýryzbaı qajy Taǵanuly "Saryaǵash" medrese-kolledjiniń dırektory Ábdiǵappar Shákirulynyń qaıtys bolýyna baılanysty Smanovtar otbasyna kóńil aıtý jedelhatyn joldady.

"Saryaǵash" medrese-kolledjiniń dırektory, belgili din janashyry, baýyrymyz Ábdiǵappar Smanovtyń qazasy týraly qaraly habardy aýyr kúızelispen qabyldadym. Bul barsha din qyzmetkeri men jamaǵatqa aýyr tıgen qaıǵyly habar boldy. Ózimniń jáne Qazaqstan musylmandary dinı basqarmasy ujymy atynan Smanovtar otbasyna qaıǵylaryńyzǵa ortaqtasa otyryp kóńil aıtamyn. 

Ábdiǵappar Shákirulynyń ımany ózine serik bolyp, asyl dinimizdi órkendetý jolyndaǵy árbir amaly ózine shapaǵat bolǵaı. Marqumnyń shákirt tárbıeleý, ýaǵyz-nasıhat júrgizý, dinı aǵartý syndy izgi isteri saýaby úzdiksiz jalǵasatyn amaldardyń qatarynda jazylǵaı.
Alla Taǵala Ábdiǵappar Shákirulyn raqymyna bólep, jánnatyn násip etkeı. Artynda qalǵan aǵaıyn-jurty men otbasyna Alladan kórkem sabyr tileımin. "Tas túsken jerine aýyr" dese de bul qaıǵyly habar barshamyzǵa aýyr tıdi. Jaratqan Jabbar Iemiz aldynan jarylqap, nyǵmetke bólengen quldarynyń qataryna qossyn dep duǵa etemiz. Aldy peıish bolǵaı.
Alla Taǵala elimiz ben jerimizdi juqpaly dertten aman etip, osynaý synaqty sátti kórkem sabyrmen jeńetin kúndi jaqyn etkeı. Ámın" delingen Bas múftıdiń kóńil aıtý jedelhatynda.

Smanov Ábdiǵappar Shákiruly

1970 jyly týǵan;
Eńbek joly:
1994 jyldan bastap «Taıaqty Eshan» meshitinde bas ımam bolyp, osy meshit janyndaǵy «Ýbaı ıbn Kaab» medresesinde ustazdyq qyzmetin qatar atqardy;
2010 jyldan bastap "Saryaǵash" medresesi dırektorynyń orynbasary qyzmetine taǵaıyndaldy;
2016 jyly "Saryaǵash" medrese-kolledji dırektorynyń tárbıe isi jónindegi orynbasary bolyp taǵaıyndaldy;
2016 jyly jeltoqsan aıynan bastap "Saryaǵash" medrese-kolledjiniń dırektory laýazymyn atqardy.