Bas múftı Shymkenttegi jańa meshit qurylysymen tanysty (FOTO)

Búgin QMDB Tóraǵasy, Bas múftı Naýryzbaı qajy Taǵanuly Shymkent qalasynda salynyp jatqan 8000 oryndy jańa meshittiń qurylysymen tanysty.

Kezdesý barysynda Shymkent qalasynyń bas ımamy Baqdáýlet Abdýrahmanov pen alyp qurylysqa jaýapty Smat Saýhatov Bas múftı Naýryzbaı qajy Taǵanulyna júrgizilip jatqan meshittiń qurylysyn tanystyrdy.

Jańa meshit qalanyń «Nursat» shaǵynaýdanynda ornalasqan. Qurylystyń jalpy kólemi – 12,0058 ga. Ǵımarattyń kólemi – 25626,0 m2, jabyq aımaqtyń kólemi – 25626,0 m2, bos aımaqtyń kólemi – 47369,6 m2, al, parkıngtyń jalpy jer kólemi 218,8h58,8 metr.

Sondaı-aq bul ǵımaratta kongress-holl, neke qııý saraıy, medrese, kitaphana men qudaıy as ótkizetin ashana, eki qabattan turatyn avtoturaq, sýburqaqtar, fıtnes ortalyq ornalasady dep josparlanýda.

Aıta ketý kerek, záýlim meshittiń qurylysyn «Munaı Qurylysy Servıs» JShS júrgizip jatyr. Kezdesý aıasynda Bas múftı Naýryzbaı qajy Taǵanuly meshit qurylysyna oń baǵa berip, qurylys júrgizýshi azamattarǵa rızashylyq bildirdi.