BAS MÚFTI ShYMKENTTEGI ZÁÝLIM MEShITTIŃ AShYLÝYNA QATYSTY
Búgin Shymkent qalasynda «Esjanuly Seıitjan qarı» meshitiniń ashylý rásimi ótti. Igi is-sharaǵa QMDB Tóraǵasy Naýryzbaı qajy Taǵanuly, Shymkent qalasynyń ákimi Ǵabıt Ábdimájıtuly, memleket jáne qoǵam qaıratkerleri qatysty.
Igi is-sharada qala ákimi Ǵabıt Ábdimájıtuly jamaǵatty jańa meshittiń ashylýymen quttyqtap, ǵumyryn Quran jazýǵa arnaǵan jerlesimiz, áıgili kallıgraf, Saýd Arabııasynan arnaıy kelgen Osman Tohaǵa Memleket basshysynyń duǵaı sálemin jetkizip, ıyǵyna shapan japty.
Ashylý rásiminde sóz alǵan Bas múftı Naýryzbaı qajy Taǵanuly: «Sizderdi «Esjanuly Seıitjan qarı» meshitiniń ashylýymen shyn júrekten quttyqtaımyn. Alla Taǵala bul meshitti izgiliktiń, birlik pen berekeniń, bilim men súıispenshiliktiń ordasy etkeı. Osy meshitten tálim alǵan jastarymyz shyraıly shahardyń, qala berdi Qazaq eliniń rýhanı damýyna óz úlesterin qosady degen senimdemin. Alla Taǵala meshitti salǵan azamattarǵa mol saýaptan jazǵaı.
Rýhanı azyq beretin birden-bir orda – meshit. Meshittiń atqaratyn qyzmeti, qoǵamdaǵy orny óte úlken. Meshit – rýhanııat ordasy, oqý-bilimniń ortalyǵy. Sebebi meshitterimiz tek qulshylyq jasaıtyn oryn ǵana emes, dinı saýat ashatyn, sábılerge azan shaqyryp at qoıatyn, jańadan otaý qurǵan jas jubaılardyń aq nekesin qııatyn, dúnıeden ótken aıaýly jandarǵa Quran oqytyp, duǵa baǵyshtaıtyn, muqtaj jandarǵa qaıyrymdylyq jasalatyn, qınalǵan adamdarǵa rýhanı qoldaý kórsetetin meıirim mekeni. Meshit salýdyń saýaby mol bolatyny sondyqtan. Paıǵambarymyz (oǵan Allanyń salaýaty men sálemi bolsyn): «Eger adamdar Allanyń úıleriniń ishinen bir úıde jınalyp Quran oqyp, ony úırenetin bolsa, olarǵa álbette tynyshtyq túsedi jáne olardy rahymshylyq búrkep, perishteler qorshaýyna alady», – degen. Bul meshit júrek tynyshtyǵy men barlyq jaqsylyqtyń ordasy bolǵaı», – dedi.
Bas múftı záýlim meshitti salýǵa demeýshilik jasaǵan belgili metsenat Serikjan Seıtjanulyna alǵysyn jetkizdi. Sonymen qatar mártebeli meıman Osman Toha aqsaqalymyzǵa qurmet kórsetip, «Qazaqstan musylmandary dinı basqarmasyna 30 jyl» merekelik medalin keýdesine taǵyp, ıyǵyna shapan japty.
Aıta ketsek, jańa meshitte bir mezette 12 myń adam qulshylyǵyn óteı alady. Meshitte konferentsııa zaly, 600 adamǵa arnalǵan ashana, jastarǵa rýhanı bilim beretin medrese, neke qııý zaly, 736 kólik sııatyn jerasty avtokólik turaǵy bar.
