Bas múftı shetel jáne elimizdiń ımamdarymen kezdesti (FOTO)
QMDB tóraǵasy, elimizdiń Bas múftıi Serikbaı qajy Satybaldyuly QMDB janyndaǵy Respýblıkalyq ımamdardyń bilimin jetildirý ıslam ınstıtýtynda bilimin jetildirip jatqan ımamdarmen kezdesti. «Qazan-jeltoqsan, 2019» oqý leginde Reseıden, Mońǵolııadan jáne elimizdiń túkpir-túkpirinen kelgen 42 ımam bilimin jetildirýde.
Serikbaı qajy Satybaldyuly ımamdarmen jyly kórisip, din qyzmetkerleriniń kókeıinde júrgen máselelerge toqtalyp ketti. Sonyń biri ımam-moldalardyń jalaqysy jaıynda: «Qoǵam músheleriniń ómirinde oryn alatyn ashy da, tushy, ystyq ta, sýyq ta jaǵdaılaryn kórip, qoldaý kórsetip, halyq pen bıliktiń ortasyndaǵy beıne bir altyn kópir ispetti, dini men dástúrin sabaqtastyryp eńbek etip kele jatqan tulǵalar – dindarlar. Sondyqtan da dinı tulǵalardyń turmystyq jaǵdaıyn, áleýmettik máselesin kóterý jáne qamqorlyq jasaý maqsatynda jýyrda memlekettik organdardyń, Prezıdent apparaty qyzmetkerleriniń qatysýymen ótken ımamdardyń respýblıkalyq III forýmynda din qyzmetkerleriniń áleýmettik máselesin kóterdik. Maqsatymyz – eń bastysy meshit qyzmetkerleriniń jalaqysyn júıeli túrde tolyq qamtamasyz etý. Máseleni sheshý úshin arnaıy baǵdarlama qurdyq. Bul baǵdarlamamen aldymyzdaǵy qańtar, aqpan aılarynda aýyl, aýdan deńgeıindegi meshit qyzmetkerleriniń jalaqysyn tolyq qamtamassyz etýdi bastaımyz» dedi.
Bas múftı: «Forýmda «Jeti rýhanı qazyq» tuǵyrnamasy qabyldandy. Bul musylmannyń boıyndaǵy negizgi kórkem sıpattardy qamtıdy», – dep sol sıpattarǵa keńinen toqtalyp ketti.
Sóz sońynda haziret Serikbaı qajy Satybaldyuly: «Óz atymnan jáne dinı basqarma atynan Islam ınstıtýtynyń dırektory Kenjeáli qajyǵa alǵysym men rızashylyǵymdy bildiremin. Aýyl-aýdan demesten osyndaǵy barlyq ımamdardyń jaǵdaıyn jasap, júıeli túrde tynymsyz eńbek etip kele jatyr. Islam ınstıtýtynda bilim tereńirek beriledi. Qurandy saýatty oqyp, tádjýıdińizdi túzep otyrasyz. Sharıǵat ilimindegi jáne dástúrge qatysty biraz máselelerdi keńinen bilip, erkin pikir almasasyzdar. Islam ınstıtýtynyń ujymy din qyzmetiniń ystyq-sýyǵyna kónip, eńbek etýde», – dep óz alǵysyn bildirdi.
Is-shara Islam ınstıtýtynyń uıymdastyrýymen «Nıet» qaıyrymdylyq qorynyń qoldaýymen «Imamǵa qurmet – ustazǵa izet» atty aktsııasyna jalǵasty. Aktsııa aıasynda bilimin jetildirip otyrǵan ár ımamǵa 5 túrli jańa qystyq kıim taratyldy.
