Bas múftı saqtyq sharalaryn qolǵa alýdy tapsyrdy (FOTO)

Elordada Bas múftı Naýryzbaı qajy Taǵanulynyń tóraǵalyǵymen QMDB Ortalyq apparatynyń kezekti jınalysy ótti. Jıynda álemdi dúrliktirip turǵan koronavırýs indetiniń aldyn alý, meshit pen medreselerde saqtyq sharalaryn júzege asyrý máselesi talqylandy.

QMDB Tóraǵasy búginde keıbir elderde koronavırýs jyldam taralyp, vırýsty juqtyrǵan adam sany artqanyn alǵa tarta kele, dertke qarsy arnaıy saqtyq sharalaryn qolǵa alýdy tapsyrdy.

«Paıǵambarymyz Muhammed (oǵan Allanyń salaýaty men sálemi bolsyn): «Juqpaly aýrýǵa shaldyqqan adamnan jyrtqysh haıýannan qashqandaı qashyńdar (qorǵanyńdar)», – degen. Biz óz otbasymyzǵa, ujymǵa, týǵan-týystarǵa jaýapty tulǵa bolǵandyqtan, árqashan saqtyq sharalaryn jasaýymyz tıis. Osy rette adam kóp jınalatyn jıyndardan, is-sharalardan, kezdesýlerden múmkindiginshe bas tartqanymyz abzal.

Jamaǵat namazynan keıin qol berip amandasyp, bir orynǵa jınalyp duǵa etý – mindet emes. Meshitke kelýshi musylman qaýymynan juqpaly aýrýdan saqtaný úshin múmkindikke qaraı betperde kıip kelýin, meshitte toptasyp otyrmaýyn, juma namazdan keıin tez arada úıine barýyn, qulshylyq jasaǵan soń qol berip amandasyp, bir jerge jınalyp, suhbattaspaýyn suraımyz», - dedi Naýryzbaı qajy Taǵanuly.

Sondaı-aq, Bas múftı medreselerdegi dáristerdi ýaqytsha toqtatý, josparlanǵan jıyndardy, semınar men konferentsııalardy, qudaıy as berý sekildi sharalardy keıinge qaldyrýdy tapsyrdy.