Bas múftı Samarqanda halyqaralyq konferentsııaǵa qatysty (FOTO)

Bas múftı Naýryzbaı qajy Taǵanuly bastaǵan qazaqstandyq delegatsııa Ózbekstannyń Samarqan qalasynda bastalǵan "Imam Matýrıdı taǵylymy: ótkeni men búgini" atty halyqaralyq konferentsııaǵa qatysty.

Delegatsııa quramynda QMDB Apparat basshysy Ǵylymbek Májıev, Sharıǵat jáne pátýa bóliminiń meńgerýshisi Sansyzbaı qajy Shoqanov, Dinı bilim jáne kadr daıarlaý bóliminiń meńgerýshisi Beıbit Myrzageldıev, Aqparat jáne qoǵammen baılanys bóliminiń meńgerýshisi Marat Bektazınov bar. Konferentsııaǵa "ál-Ázhar" sheıhy, Mysyr Bas ımamy Ahmet Taıyp, sonymen qatar musylman elderiniń múftıleri men din qaıratkerleri qatysty.

Basqosýda ulyq ımam Ábý Mansur Matýrıdıdiń rýhanı murasyn halyqqa nasıhattaý, dinı Ekstremızm men terrorızmge qarsy musylman úmbeti ǵalymdarynyń aǵartýshylyq kúshin biriktirý, álemdik saıası ahýal kún saıyn qubylǵan zamannyń syn-qaterlerine jaýap berý, adamdar arasynda meıirimdilik pen ózara kelisim qundylyqtaryn qalyptastyrý, t.b. máseleler talqylandy.

Mysyrdyń "ál-Ázhar" ýnıversıteti men Ózbekstan musylmandary dinı basqarmasynyń birlese uıymdastyrǵan halyqaralyq konferentsııa úsh kúnge sozylmaq. Halyqaralyq basqosý sońynda arnaıy Qarar qabyldanyp, Úndeý jarııalanbaq.