Bas múftı Reseı múftıimen telefon arqyly sóılesti
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Reseı Federatsııasy musylmandary dinı basqarmasynyń tóraǵasy, Reseıdiń múftıler keńesiniń tóraǵasy Ravıl Gaınýtdınmen telefon arqyly sóılesti.
Ekeýara áńgime barysynda koronavırýs pandemııasynyń álem jurtshylyǵyna tıgizip otyrǵan zııany, indetten saqtanýdyń alǵysharttary, osyndaı kezde jáne qasıetti Ramazan aıyndaǵy jumystardy úılestirý jaıyn talqylady.
Qazaqstan men Reseı múftıleri koronavırýs indetine qarsy barlyq tıimdi sharalardy jasap, máseleniń tıimdi sheshilýine bar kúshin salatynyn atap ótti. Sondaı-aq telefon arqyly áńgime barysynda eki eldiń úkimetteriniń ınfektsııanyń taralmaýy, halyqtyń densaýlyǵy men dertke shaldyqqandardy emdeý baǵytynda jasap jatqan jumystaryna joǵary baǵa berdi.
QMDB tóraǵasy Naýryzbaı qajy Taǵanuly men Reseıdiń múftıler keńesiniń tóraǵasy Ravıl Gaınýtdın osyndaı qıyn kezeńde el úshin Alla Taǵalaǵa kóbirek duǵa qylýdyń mańyzy týraly áńgimeledi. Osyǵan baılanysty juma kúni birlesip duǵa jasaý týraly sheshimge toqtaldy.
«Sizdiń «Biz – birgemiz, tilegimiz – ortaq» atty ıgi bastamańyzdy qoldaımyz. Sol úshin 10 sáýir, juma kúni namaz kezinde bárimiz bir mezette alaqan jaıyp, duǵa jasap, Jaratýshy Alladan meıirim-pana tileımiz». – dep atap ótti Ravıl Gaınýtdın.
