Bas múftı Ramazanǵa baılanysty baspasóz máslıhatyn ótkizdi (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly QR Prezıdenti janyndaǵy Ortalyq kommýnıkatsııalar qyzmetiniń alańynda «Karantın jaǵdaıyndaǵy Ramazan» taqyrybynda arnaıy baspasóz konferentsııasyna qatysty.

Tikeleı Efırde ótken baspasóz konferentsııasyna QMDB Tóraǵasynyń orynbasary, naıb múftı Ershat Ońǵarov ta qatysty.

Bas múftı barsha qaýymdy ısi musylmannyń ulyq aıy – Ramazannyń kelýimen quttyqtap, ár otbasyna baqyt pen bereke, birlik pen tatýlyq tiledi. «Alla Taǵala ustaǵan orazamyzdy, jasaǵan duǵamyzdy, oryndy sebeptermen aýyz bekite almaı qalǵan jandardyń qaıyrly amaldaryn qabyl etkeı», - dedi Naýryzbaı qajy Taǵanuly.

Bas múftı onlaın rejımde nasıhat tyńdap, úıden shyqpaı saýapty amaldarǵa ortaqtasýǵa bolatynyn tilge tıek etti.

«Osy rette barsha otandastarymdy kómekke muqtaj otbasylarǵa jan-jaqty qoldaý kórsetýge, elimizdegi meshitter arqyly aýzy berik otandastarymyzǵa aýyzashar taǵamdar taratýǵa shaqyramyn! Sadaqa – pendeniń mal-dáýletin azaıtpaıdy, kerisinshe, berekesin arttyrady. Biz bergen sadaqa bir otbasyn qýanyshqa bóleıdi. Endeshe, kómekke zárý shańyraqty shattyqqa bólep, úlkenniń batasyn alyp, alǵysyna bóleneıik», - dedi Naýryzbaı qajy Taǵanuly.

Baspasóz konferentsııasynda naıb múftı Ershat Ońǵarov QMDB Tóralqa májilisinde pitir sadaqasy mólsheri 370 teńge bolyp bekitilgenin atap ótti. Sonymen qatar zeket pen pitir sadaqasyn onlaın rejımde berýge bolatynyn jetkizdi.

Tikeleı kórsetilim «24 Habar» telearnasynda, Ortalyq kommýnıkatsııalar qyzmetiniń YouTube, Facebook jelisindegi paraqshalarynda ótkizildi.