Bas múftı Qyzylordada «Qamqor-Sharapat» ortalyǵynyń jumysymen tanysty (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Qyzylorda oblysyna jasaǵan jumys saparynda ortalyq meshit janynan jańadan ashylǵan «Qamqor-Sharapat» salttyq qyzmet kórsetý ortalyǵynyń jumysymen tanysty. Oblys bas ımamy Bolatbek Ulasqanuly Naýryzbaı qajy Taǵanulyna ortalyqtyń jumysy jaıly baıandap berdi.

«Qazaq halqy adamdy aqtyq saparǵa shyǵaryp salý rásimine mán bergen. Biz máıitti sharıǵat talaptaryna saı jerleýge kóńil bólgen halyqpyz. «Qamqor-Sharapat» salttyq qyzmet kórsetý ortalyǵy jerleý rásimderiniń sharıǵat aıasynda durys oryndalýyna kómektesedi», – dep atap ótti Naýryzbaı qajy Taǵanuly.

Aıta ketsek, ımamdar forýmynda «Zırat jáne zııarat mádenıeti» qujaty qabyldanǵan bolatyn. Qujatty qabyldaýdaǵy maqsat – zırat kóterý, jerleý rásimderi kezinde ysyrapqa jol bermeý. «Qamqor-Sharapat» salttyq qyzmet kórsetý ortalyǵy osy baǵyttaǵy jumystardy júıeleýge úles qospaq.