Bas múftı qurban shalý rásimine qatysty (FOTO)

Meshitterde aıt namazy oqylyp bolysymen musylman qaýymynyń bilek sybana kiriser kelesi amaly – Alla razylyǵy úshin qurbandyq shalý bolyp tabylady. Ardaqty paıǵambarymyz (s.ǵ.s.) aıtqandaı, bul kúnderi musylman balasy qurban shalýdan basqa súıikti ispen Alla Taǵalaǵa jaqyndaı almaq emes. Rabbysynyń razylyǵyn izdegen árbir múmin bul kúnderi shamasy jetkenshe qurbandyq shalyp, jan-jaǵyndaǵy joq-jitikke qaraılasýǵa asyǵady.

Elorda mańyndaǵy «Altyn taǵa» mal bazary búgin osyndaı nıet jetegindegi jamaǵatqa lyq toldy dese de bolǵandaı. Sondaı-aq, bul bazarda Elorda meshitteriniń uıymdastyrǵan «Rabbyń úshin qurban shal!» aktsııa aıasynda jıylǵan maldar qurbandyqqa shalynyp, bazar basynda arnaıy shara ótkizildi. Jyl saıyn dástúrli túrde ótip kele jatqan qurban shalý rásimine QMDB tóraǵasy, Bas múftı Serikbaı qajy Oraz ózi kelip qatysty. Bas múftı qurban shalynatyn oryndaǵy jaı-kúımen tanysyp, «Rabbyń úshin qurban shal!» aktsııasy qamtıtyn qaıyrymdylyq sharasynyń aýqymynan da habardar boldy.

Qurban shalý rásimine qatysyp, bazardaǵy jalpy ahýalmen tanysyp bolǵannan keıin Bas múftı aktsııaǵa qatysýshylarǵa arnalǵan merekelik dastarhannan dám aýyz tıip, jurtshylyqty merekemen quttyqtap, izgi lebizin bildirdi. Berekeli basqosý sońynda qasıetti Quran aıattary oqylyp, duǵa jasaldy.

Sýretterdi «FOTOGALEREIa» aıdarynan kóre alasyzdar!