Bas múftı quttyqtaýy (VIDEO)
2019 jyldyń 11 tamyzy – Qurban aıttyń birinshi kúni!
Serikbaı qajy ORAZ,
Qazaqstan musylmandary dinı basqarmasynyń tóraǵasy, Bas múftı
QURBAN AIT QUTTY BOLSYN!
Asa Qamqor, erekshe Meıirimdi Allanyń atymen bastaımyn!
Qurmetti qaýym!
Barshańyzdy qasıetti Qurban aıttyń kelýimen quttyqtaımyn. Aıt qabyl bolsyn! Otbasylaryńyzǵa baq-bereke, yrys pen yntymaq, Allanyń amandyǵyn tileımin!
Qurban aıt – ısi musylmannyń ulyq meıramy. Aıt kúnderi aǵaıyn-jurt bir-birine: «Aıt qabyl bolsyn!» aıtyp, izgi tilekterin jetkizip, alǵystaryn jaýdyrady. Osy rette sizderge izgi nıetpen Jaratqannyń jaqsylyǵyn tileımin.
Týys pen baýyrǵa, kórshi men dos-jaranǵa aıttap barý, qadirli qonaqqa aıttyq berip, úlkenniń alǵysy men batasyn alý – sonaý zamannan jalǵasyp kele jatqan musylmandyq dástúrimiz. Osy ıgi dástúrdi qoǵamda qaıta jańǵyrtyp, jastarǵa úlgi-ónege kórsetýge shaqyramyn!
«Qurban» sózi «jaqyn bolý», «jaqyndaý» degen uǵymdardy bildiredi. Musylman balasy aıt kúni qurbandyq shalý arqyly Allaǵa degen aq nıetin pash etedi.
Óıtkeni, Alla Taǵala qasıetti Quranda:
«Umytpańdar, olardyń eti de, qany da eshqashan Allaǵa jetpeıdi. Oǵan jetetin nárse – júrekterińizge uıalaǵan taqýalyqtaryń (shynaıy nıetteriń)» («Haj» súresi, 37-aıat), – dep adal nıettiń mańyzdylyǵyn atap ótken.
Ardaqty aǵaıyn!
Qurban aıtta oryndalatyn eń qaıyrly amal – qurban shalý. Aıt kúni jaǵdaıy bar kisiler qurban shalyp, ony qaraýsyz qalǵan qarııalar men jetimderge, kópbalaly otbasylarǵa taratyp, saýap alýǵa tyrysady. Alaıda, aıt kúnderi mal baǵasy qymbattap ketetin jaǵdaı jıi oryn alady. Osy rette otandastarymdy mal baǵasyn sharyqtatpaı, paıdaǵa emes, saýapqa bólenýge úndeımin. Óıtkeni, Qurban aıt – qanaǵat pen qaıyrymdylyqtyń merekesi.
Ulyq meıramda jasaıtyn barsha saýapty amaldaryńyz, qaıyrymdylyq isterińiz qabyl bolǵaı! Qasıetti Mekke qalasynda qajylyǵyn ótep, elimizdiń ıgiligi úshin duǵa jasap jatqan ata-apalarymyzdyń, baýyrlarymyzdyń tilegi qabyl bolǵaı!
Alla Taǵala barshamyzdy aıttan aıtqa aman-esen jetkizip, izgi ister men qýanyshty sátterde basqosýymyzdy násip etkeı! Ámın!
