Bas múftı qurban aıt namazyn júrgizip, ýaǵyz aıtty

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly elordadaǵy «Áziret Sultan» meshitinde aıt namazyn júrgizip, jamaǵatqa ýaǵyz aıtty.

«Musylman jurtshylyǵynyń ulyq merekesi, qasıetti qurban aıt barshamyzǵa qutty bolsyn! Qurban aıt kúni qurbandyq shalyp, onyń etinen muqtajdarǵa taratý, jaqyndardy zııarat etip, aıt kúnimen quttyqtaý, balalarǵa aıttyq syılyq berý, ata-babalarymyzdyń ıgi dástúri.

Keshe arapa kúni bolyp, qajylyq saparyndaǵy jerlesterimiz Arapat taýynyń mańyńda duǵa jasap, Muzdalıfada túnedi. Qajylyqqa barmaǵan jandar nápil oraza ustap, búgingi qurban aıtqa daıyndaldyq. Búgin minekeı tań sáride qurban aıt namazyn oqý nıetimen meshitke jınalyp otyrmyz. Jalpy bul kúnderde Alla Taǵalany ulyqtaý, tıisti dinı rásimderdi oryndaý – pendeniń taqýalyǵynyń belgisi. Alla Taǵala Qasıetti Qurannyń «Haj» súresiniń 32-aıatynda: «Kim Allanyń belgilerin ulyqtasa, shyndyǵynda ol júrektiń taqýalyǵynan», – degen.

«Qurban» sózi «jaqyn bolý», «jaqyndyq» degen maǵynalardy bildiredi. Demek, Allanyń rızashylyǵy úshin qurbandyq shala otyryp, musylman balasy jaratqan Iesine jaqyndap, kúnálarynyń keshirilýine, úlken saýapqa kenelýine múmkindik alady», - dep atap ótti Naýryzbaı qajy Taǵanuly.

Aıt namazynan keıin Bas múftı elimizdiń tynyshtyǵy men bolashaǵy úshin duǵa jasap, ata-babalar rýhyna Quran aıattaryn baǵyshtady.

Источник: Aisha