BAS MÚFTI QURANDY JATQA JÁNE MÁNERLEP OQÝDAN SAIYSTYŃ ShYMYLDYǴYN AShTY (FOTO)
Elordada Qazaqstan musylmandary dinı basqarmasynyń bastamasymen Quran Kárimdi jatqa jáne mánerlep oqýdan XIII respýblıkalyq baıqaýǵa irikteý saıysy ótti.
Onda QMDB Tóraǵasy, Bas múftı Naýryzbaı qajy Taǵanuly arnaıy qatysyp, is-sharanyń shymyldyǵyn ashty. Ol Qasıetti Qurandy oqýdyń, jattaýdyń mán-mańyzyna toqtaldy. Sonymen qatar, halqymyz qasıetti kitapty erteden qasterlegenin atap ótti.
«Quran Kárim – Allanyń sózi. Sondyqtan Quran Kárim – qundylyǵyn eshqashan joǵaltpaıtyn asyl qaınar, qundy mura. Quran Kárim – danalyq pen ósıetke toly uly kitap. Qasıetti Qurannyń baǵasyn, mańyzyn shegelep, naqtylaǵan derekter dinimizde óte kóp. Máselen, Jaratýshy Iemiz «Qurandaǵy» «Aǵraf» súresiniń 204-aıatynda: «Quran oqylǵan kezde oǵan qulaq salyp, únsiz tyńdańdar! Sol kezde Allanyń raqymyna bólenesińder» – deıdi. Al Paıǵambarymyz Muhammed-Mustafa (oǵan Allanyń salaýaty men sálemi bolsyn) bir hadısinde: «Bul Qurandy oqyńdar. Sebebi ol Qııamet kúni óz ıelerine (ıaǵnı Qurandy laıyqty túrde oqyp, amal qylǵan kisilerge) shapaǵatshy bolady» – degen.
Muny halqymyz ejelden uǵynǵan. Iaǵnı, ultymyz Allanyń sózi Qasıetti Qurandy qasterlegen. Sondyqtan babalarymyzdan Quran jaıly kóptegen asyl sóz, tereń ósıet qalǵan. Mysaly, qazaqtyń kórnekti jazýshysy Sherhan Murtaza bylaı deıdi:
«Temirdi tat shiritedi. Tat temirdiń ózinen shyǵady.
Adamdy azdyratyn jaman qylyqtar da ózińnen shyǵady. Ol da tat. Ony sabyndap jýyp ketire almaısyń.
Adam janyn tat bassa, ony tek kitap ketire alady. Árıne, asyl kitap, adal kitap.
Eń birinshi – Quran!
Ekinshi – hadıster!
Uly klassıkter.
Qazaqtyń uly aqyn-jazýshylary.
Kitap jem, sý suramaıdy. Kitap – ǵajaıyp qazyna.
Kitap – ómirserik.
Kitapty súımegen Qudaıdy da súımeıdi.
Bir kem dúnıe».
Kórdińiz be, zańǵar jazýshymyz adamnyń rýhanı baıytatyn sebep kitap dese, al kitaptardyń ishinde eń aldymen Allanyń kitaby Qasıetti Qurandy ataıdy. Osynyń ózi-aq halqymyzdyń Quranǵa degen syı-qurmetin, yqylasyn bildirse kerek» – dedi Naýryzbaı qajy Taǵanuly.
