BAS MÚFTI QAJYLYQ MISSIIaSYNYŃ QORYTYNDY ESEBIN TYŃDADY (FOTO)
Elordada Qazaqstan musylmandary dinı basqarmasynyń tóraǵasy Naýryzbaı qajy Taǵanulynyń bastamasymen qajylyq maýsymynda Mekke men Mádına qalalarynda qyzmet atqarǵan Qajylyq mıssııasynyń qorytyndy esebi tyńdaldy.
Dinı basqarma ujymy qatysqan jıynda mıssııa tóraǵasy Ershat Ońǵar Bas múftı Naýryzbaı qajy Taǵanulyna 2024 jyldyń qajylyq maýsymynda atqarylǵan jumys jóninde baıandap berdi. Aldymen mıssııa jumysyn baıandaıtyn shaǵyn beınerolık nazarǵa usynylyp, Ershat Aǵybaıuly qajylyq mıssııasynyń bes baǵyty – uıymdastyrý men úılestirý, ýaǵyz-nasıhat, pátýa jáne suraq-jaýap, alǵashqy medıtsınalyq kómek, aqparattyq súıemeldeý baǵyttary boıynsha keńirek toqtaldy.
Jumys esebin tyńdaǵan Bas múftı Naýryzbaı qajy Taǵanuly mıssııa ókilderine atqarǵan saýapty is úshin alǵysyn bildirip, qajylyq maýsymyn uıymdastyrý jumysyn áli de damytý, jetildire berý kerektigine nazar aýdardy. Sondaı-aq jıynǵa qatysýshylar da qajylyq jumysyn joǵary deńgeıde uıymdastyrý tetikterine toqtalyp, naqty usynys-pikirlerin ortaǵa saldy.
