BAS MÚFTI QARILARǴA IJAZA TABYSTADY
Búgin Almaty qalasyndaǵy Almaty Ortalyq meshitinde qasıetti Quran Kárimdi tolyq meńgerip, qyraǵat iliminen arnaıy synaqtan súrinbeı ótken qarılarǵa ıjaza tabystaý rásimi ótti.
Atalǵan sharaǵa Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly qatysyp, qarı shákirtterdi quttyqtap, Quran iliminiń artyqshylyǵy men onyń úmbet ómirindegi mańyzyna toqtaldy.
«Búgingi basqosý qasıetti Quranǵa qyzmet etýdi ómirlik murat etken shákirtterimizdiń eńbegi baǵalanyp, ıjaza kýálikteri tabystalatyn erekshe kún. Bul tek bir oqý baǵdarlamasynyń aıaqtalýy emes, sonymen qatar Alla Taǵalanyń kálámin durys oqyp, ózgelerge úıretýge berilgen úlken jaýapkershiliktiń bastalýy. Alla Taǵala qasıetti Quranda:«Rasynda, Allanyń quldarynyń ishinen ǵalymdary ǵana Odan shynaıy túrde qorqady» («Fatyr» súresi, 28-aıat), – dep bilim ıeleriniń dárejesin joǵary qoıǵan.
Paıǵambarymyz (oǵan Allanyń salaýaty men sálemi bolsyn): «Senderdiń eń jaqsylaryń – Qurandy úırenip, ony ózgelerge úıretkenderiń», – degen (Buharı). Mine, búgin osy súıinshi hadıstiń aıasynda tárbıelenip, Quran ilimin meńgergen shákirtterimizge kýálik tabystap otyrmyz»,- dedi Bas múftı Naýryzbaı qajy Taǵanuly.
Shara aıasynda Asym qyraǵatynyń Hafs jáne Shuǵba rıýaıattary boıynsha, ash-Shatybııa jolymen Qurandy tolyq meńgergen qarılarǵa arnaıy ıjaza kýálikteri tabystaldy. Atap aıtqanda, Abdazım Nıǵmatýlla Saýranbekuly, Aǵartý Nurjan Asylbekuly, Bolat Dáýren Salamatuly, Musar Nursultan Bákiruly, Nııaz Rınat Rýslanuly jáne Rahmetýlla Islam Qurbanjanuly ıjaza ıegeri atandy.
