Bas múftı «Qamqor-Sharapat» ortalyǵynyń jumysymen tanysty (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Pavlodar qalasynda meshit janynan ashylǵan «QAMQOR-SHARAPAT» ortalyǵynyń jumysymen tanysty.

Pavlodar oblysynyń bas ımamy Joldas Qospaquly Bas múftıge ortalyq jumysyn tanystyrdy. Bas ımam halyqqa dinı salttyq qyzmet kórsetýdiń baǵyttary jaıly baıandady.

Naýryzbaı qajy Taǵanuly jýrnalısterge bergen suhbatynda: «Biz ımamdar forýmynda «Zırat jáne zııarat mádenıeti», «As berý mádenıeti» qujattaryn qabyldadyq. Atalǵan qujattardyń negizgi maqsaty – halyq arasynda qudaıy as berý, zırat kóterý men qabirlerdi zııarat etýdiń sharıǵatqa saı ádebi men mádınetin qalyptastyrý.

Ózderińizge belgili, keıde keıbir baýyrlarymyz jaqyn týysy qaıtqan kezde ysyrapqa jol berip, sharıǵatymyz talap etpegen is-áreketter jasap jatady. Biz osy máseleni sheshýdiń balama joly retinde meshit janynan dinı salttyq qyzmet kórsetý ortalyqtaryn ashyp, qazaly úıge barynsha kómek kórsetip kelemiz. Sonymen qatar as berý ádebin qalyptastyrý baǵytynda halyqty ysyrapqa jol bermeýge úndeımiz. Allaǵa shúkir, jalpy jamaǵat pen zııaly qaýym ókilderi bul bastamamyzdy qoldap, ózderiniń izgi nıetterin jetkizýde», – dep atap ótti.

Aıta ketsek, Pavlodar oblystyq Máshhúr Júsip meshiti janynan ashylǵan «QAMQOR-SHARAPAT» dinı salttyq qyzmet kórsetý ortalyǵynda juqpaly dertke shaldyǵyp, qaıtys bolǵan jandardy jerleıtin arnaıy mamandar jumys isteıdi.