BAS MÚFTI QADIR TÚNINDE QURAN HATYM DUǴASYN JASADY (FOTO)
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly qasıetti Qadir túninde elordadaǵy «Áziret Sultan» meshitine arnaıy baryp, jamaǵatpen birge hatym duǵasyn jasady.
Bas múftı aldymen jamaǵatty myń aıdan da qaıyrly bolǵan Qadir keshimen quttyqtap, Qurandy tolyq hatym etken qarılarǵa aıryqsha alǵysyn bildirdi.
«Bul túndi kúlli musylman úmbeti asyǵa kútedi. Qadir túni – duǵalar qabyl bolatyn, Jaratýshy Alla Taǵalanyń buıryǵymen perishteler túgeldeı jer betine túsip, tań atqansha adamzatqa sálem jaýdyratyn tún. Ramazan kirgen túnnen bastap taraýyq namazynda oqylatyn Quran Kárimniń hatym duǵasyn dál qasıetti Qadir túni jasaýymyzdyń sebebi de – osy.
Birde Aısha anamyz (oǵan Alla razy bolsyn) ardaqty Paıǵambarymyz Muhammedten (oǵan Allanyń salaýaty men sálemi bolsyn): «Ýa, Allanyń Elshisi, Qadir túninde qandaı duǵa tileıin?» dep suraıdy. Sonda Paıǵambarymyz (oǵan Allanyń salaýaty men sálemi bolsyn): «Alla, rasynda, Sen keshirimdisiń jáne keshirgendi jaqsy kóresiń. Meni keshire kórshi» dep aıtasyń» dep jaýap bergen. Hadısterdiń birinde: «Kim de kim Qadir túni ımanmen jáne saýabyn úmit etip qulshylyq etse, onyń aldyńǵy kúnálary keshiriledi» delingen.
Alla Taǵala barshamyzdyń qate-kemshiligimizdi keshirip, óz meıirimine bólegeı. Rabbymyz Qadir keshinde shynaıy ımanmen jasaǵan duǵalarymyzdy, namazdarymyzdy, bergen sadaqalarymyzdy, oqyǵan Quranymyzdy qabyl etip, saýabyn eselep jazǵaı» dedi QMDB Tóraǵasy.
Bas múftı Quran Kárimniń sońǵy aıattary oqylǵan taraýyq namazynan keıin hatym duǵasyn jasap, jer betine beıbit ómir, elimizge amandyq, jurtymyzǵa tynyshtyq tiledi. Quran Hatym saýabyn eldigimizdiń jolynda eren eńbek etken asyl tulǵalardyń rýhyna baǵyshtap, qazirgi tańda elimizdiń birneshe aımaǵynda bolyp jatqan tasqyn sýdan pana, turǵyndarǵa jeńildik tiledi.
Aıta keteıik, Dinı basqarmanyń tól telearnasy «Munara TV» men «Qazaqstan» ulttyq arnasy «Myń aıdan da qaıyrly Qadir túni» atty baǵdarlama usynyp, qos meshitten tikeleı Efırde habar taratýda. Sondaı-aq Bas múftı «Qazaqstan» ulttyq arnasynyń tikeleı Efırinde telekórermenge nasıhat aıtyp, qazaq eline ıgi tilegin arnady.
