Bas múftı Ózbekstan saparynyń qorytyndysy boıynsha suhbat berdi (VIDEO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Ózbekstan Respýblıkasyna jasaǵan resmı sapary boıynsha «24 Habar» telearnasy, «Hıkmet» teleradıostýdııasy men ózbekstandyq buqaralyq aqparat quraldaryna suhbat berdi.

«Alǵashqy resmı saparymdy kórshi elden bastadym. Ózbekstan – Qazaqstannyń Ortalyq Azııadaǵy eń jaqyn senimdi seriktesi. Qazaq-ózbek – baǵzy zamannan baýyrlas el. Bizdi biriktiretin qundylyqtar kóp. Dinı mektebimiz ben mázhabymyz bir. Bizdiń halqymyzda «Kórshini Qudaı qosady, dosty tańdaısyń» degen sóz bar. Ózbekstan múftıi Ýsmonhon qajy Alımovpen kezdesýde qazirgi jahandyq syn-qaterge jaýap berýde musylman úmbetiniń ózara yntymaǵyn arttyrý, dinı merekelerdi bir kúnde atap ótý, ortaq pátýalar qabyldaý, destrýktıvti dinı aǵymdardyń teris úgit-nasıhat jumystaryna jol bermeý, baýyrlas elderdiń din qyzmetkerleriniń bilimin arttyrý, tájirıbe almasý sharalaryn uıymdastyrý, Matýrıdı senim mektebi men Ábý Hanıfa mázhabyn halyqqa nasıhattaý, dinı oqý-aǵartý salasy boıynsha birlesken jobalardy júzege asyrý syndy ortaq kelisimderge keldik», – dep atap ótti Naýryzbaı qajy Taǵanuly.