Bas múftı oblys ákimimen birge «Qoǵamdyq keńestiń» otyrysyna qatysty (FOTO)
QMDB tóraǵasy, Bas múftı Naýryzbaı qajy Taǵanuly Jambyl oblysy, Qordaı aýdanyna jasaǵan sapary aıasynda birqatar kezdesýler ótkizdi.
Sonyń ishinde mańyzdysy atalǵan aımaqqa jaqynda ǵana ákim bop taǵaıyndalǵan Berdibek Saparbaevtyń tóraǵalyǵymen ótken «Qoǵamdyq keńestiń» otyrysyna qatysty. Jıynda negizinen Qordaıdaǵy qaqtyǵys pen eki ult arasynda týyndaǵan túsinispeýshilik aıtyldy. Aqsaqaldar, kásipkerler men belsendilerden quralǵan qoǵamdyq keńeste ultaralyq tatýlyqty saqtaý, dinaralyq dińgekti myqtap ustaý jaǵy kóbirek sóz boldy. Jańadan taǵaıyndalǵan óńir basshysy din ókilderimen birlese jumys isteýdi jalǵastyra beretinin jetkizdi.
Óz kezeginde bas múftı bul jumystarǵa osy aımaqtaǵy ımamdar tegis jumyldyrylady. Jamaǵatty tárbıeleýde atqarylatyn ortaq jumysqa biz qashan da daıynbyz dedi.
«Musylman – bir-birine baýyr. Kishkentaı qatelik úlken daýǵa aınaldy. Sonyń kesirinen bala jetim, áıel jesir qaldy. Eki musylmannyń qarý kezenip, mundaı teris áreketke barýy jaqsy is emes. Sondyqtan jumyla judyryq bop, bárimiz birige alǵa jyljý mańyzdy der edim. Qazaqstan deıtin jalǵyz otanymyz bar. Al dinimizde otandy qorǵaýdyń mańyzy óte zor. Keshegi babalardyń qasyq qanymen, analardyń kóz jasymen kelgen baıtaq dalany qorǵaý, qasterleý barshaǵa ortaq», - dedi Naýryzbaı qajy Taǵanuly.
Keńestiń otyrysynan soń aýyl aqsaqaldary jastardyń tárbıesine jete mán beremiz, olarda san jyldar boıy qalyptasqan syılastyqty jalǵastyrady dep ýáde berdi. Sonymen qatar Dinı basqarma basshysy osy saparynda dúngender turatyn Aýqatty, Sortóbe, Masanshy aýyldarynyń turǵyndarymen de tildesti. Olarǵa tatýlyq týrasynda aıtyp, qanshama jyldan beri kele jatqan tutastyqqa syzat túsirmeýge shaqyrdy.
