BAS MÚFTI NUR-MÚBARAK ÝNIVERSITETINIŃ TÚLEKTERINE DIPLOM TABYSTADY
Búgin Almaty qalasyndaǵy Nur-Múbarak Egıpet ıslam mádenıeti ýnıversıtetiniń bitirýshi túlekterine saltanatty túrde dıplom tabystaý rásimi ótti.
Atalǵan sharaǵa Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly arnaıy qatysyp, jas mamandarǵa izgi lebizin bildirdi.
Saltanatty jıynda QMDB Tóraǵasymen qatar Bas múftı keńesshisi Smaıyl Seıitbek, QMDB Apparat basshysy Ǵylymbek Jádigeruly, ýnıversıtet basshylyǵy, ujymy men oqytýshy-professorlar quramy, stýdentterdiń ata-analary jáne arnaıy shaqyrylǵan qonaqtar qatysty.
«Sizder bilim alǵan Nur-Múbárak ýnıversıteti – elimizdegi dinı bilimniń qarashańyraǵy. Bul oqý orny myńdaǵan shákirt tárbıelep, Qazaqstandaǵy dinı qyzmettiń damýyna ólsheýsiz úles qosyp keledi. Ýnıversıtet qabyrǵasynda alǵan bilimderińiz sizderdi tek maman ǵana emes, adam retinde, qoǵam aldynda jaýapty tulǵa retinde qalyptastyrýǵa baǵyttaldy.
Qadirli túlekter!
Búgin qoldaryńyzǵa alatyn dıplom bilim jolynda baǵyndyrǵan bir beles bolǵanymen, úlken jaýapkershiliktiń bastalǵanyn bildiredi. Sizder endi halyqpen jumys isteıtin, eldiń rýhanı ómirine yqpal etetin, jastarǵa baǵyt-baǵdar kórsetetin mamandar qataryna qosyldyńyzdar. Qazaq halqy ejelden: «Ǵalymnyń haty ólmeıdi, jaqsynyń aty ólmeıdi» degen. Sondyqtan sizderdiń eń basty mindetterińiz – alǵan bilimderińizdi halyq ıgiligine jumsaý.
Búgingi qoǵam din qyzmetkerlerinen tereń bilimdi ǵana talap etpeıdi. Kórkem minezdi bolý, danalyqty ustaný, sabyrly bolý syndy adamı qundylyqtar dıplomnan da qymbat qazyna ekenin umytpaǵaısyzdar. Halyqtyń senimine ıe bolý úshin adam eń aldymen óziniń isimen, ádebimen jáne adamgershiligimen úlgi bolýy kerek», - dedi Bas múftı Naýryzbaı qajy Taǵanuly.
Aıta keteıik, bıyl oqý jylynda ýnıversıtetti 497 stýdent sátti támamdap, úlken ómirge joldama aldy. Onyń ishinde 457 stýdent bakalavrıat, 32 stýdent magıstratýra jáne 8 stýdent doktorantýra baǵdarlamalaryn aıaqtady. Bakalavrıat túlekteriniń ishinde Islamtaný mamandyǵyn 276 stýdent, Dintaný mamandyǵyn 85 stýdent, Teologııa mamandyǵyn 72 stýdent, Shetel fılologııasy bilim berý baǵdarlamasyn 31 stýdent, al Aýdarma isi bilim berý baǵdarlamasyn 33 stýdent támamdady.
