Bas múftı «Nur Astana» meshitinde juma ýaǵyzyn aıtty (FOTO)
Búgin Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly «Nur Astana» meshitinde «Namaz – ulyq ǵıbadat» atty taqyrypta juma ýaǵyzyn aıtty, dep habarlaıdy ummet.kz tilshisi.
Bas múftı jamaǵatqa ardaqty Elshiniń (Oǵan Allanyń salaýaty men sálemi bolsyn) «kózimniń nury» dep ataǵan, dinniń tiregi, árbir musylmannyń mıǵrajy sanalatyn, bes paryzdyń biri – namaz jaıynda salıqaly sóz qozǵady.
«Paıǵambarlar sardary (Oǵan Allanyń salaýaty men sálemi bolsyn) birde sahabalarynan «Senderdiń aralaryńnan bir adamnyń esiginiń aldynda ózen aǵyp, ol sol ózenge kúnine bes ret shomylsa, ol adamda kir qala ma?» – dep suraǵanda, sahabalar: «Joq qalmaıdy», – dep jaýap qaıyrady. Sonda Alla Elshisi (Oǵan Allanyń salaýaty men sálemi bolsyn): «Sýdyń kirdi tazalaıtyny sekildi bes ýaqyt namaz da kúnálardy tazalaıdy», – dep musylmandardy súıinshilegen.
Iaǵnı kúndelikti kúıbeńmen kóńilimiz ben júregimizdi qalaısha tot basyp qalǵanyn baıqamaı jatamyz. Kóńilge túsken kirbińdi, júrekke túsken daqty tazartyp, musylmandy arly, abyroıly bolýǵa jeteleıtin, eki dúnıede de dárejesin joǵarylatatyn osynaý ǵıbadatqa jiti mán berip, asqan kirpııazdyqpen qaraǵan abzal. Basqa bir hadıste Alla Elshisi (Oǵan Allanyń salaýaty men sálemi bolsyn) «Alla quzyrynda eń súıikti amal qaısy?» degen suraqqa «ýaqytynda oqylǵan namaz» dep jaýap bergeni aıtylady. Olaı bolsa, Allanyń quzyryndaǵy súıikti amal sanalǵan namaz ári rýhanı kirlerden tazarýǵa, ári qyzǵanysh, kórealmaýshylyq, jek kórý sııaqty júrek aýrýlarynan arylýǵa, ári kúnálardan boıymyzdy aýlaq salýǵa septigin tıgizetin birden-bir amal», – dedi Naýryzbaı qajy Taǵanuly.
Sonymen qatar, Bas múftı namaz qulshylyǵynyń paryz bolý tarıhyna, dindegi ornyna, árbir musylman úshin mańyzy men qasıeti jaıynda baıandap, ǵulamalar ómirinen ǵıbratty támsilder aıtyp ótti.
Namaz sońynda Quran oqylyp, saýaby marqumdarǵa baǵyshtaldy. Sosyn jamaǵatpen el-jurtymyzdyń tynyshtyǵy men álem musylmandarynyń beıbitshiligine arnap duǵa jasaldy.
