Bas múftı Naýryz merekesimen quttyqtady

Qadirli baýyrlar!

Barshańyzdy jyl basy, kúlli túrki jurtynyń dástúrli merekesi – áz-Naýryz meıramymen shyn júrekten quttyqtaımyn!

Halqymyz «Ulys oń bolsyn, aq bol molsyn!» aıtyp, bir-birine izgi tilegin bildiretin, barsha adamzatty baýyrmaldyq pen tatýlyqqa úndeıtin osynaý shýaqty merekede ár otbasyǵa Allanyń amandyǵy men bereketin, baqyt pen birlik, tatýlyq pen bar jaqsylyqty tileımin.

Naýryz – baǵzy zamannan beri ult retinde erekshe mán berip kele jatqan ulttyq merekemiz. Bul kúnde dýaly aýyz aqsaqaldar dastarhan basynda batasyn berip, renjiskender keshirim jolyn ustanyp, tatýlasý syndy saýapty hám salaýatty sharalar birine-biri ulasyp jatady. Alla Taǵala qýanyshty kúnderimizdi eselesin!

Biz – tarıhymyzdyń san qıly syndarly sátterinde úmitsizdikke berilmeı, bir Alladan medet tilegen halyqpyz. Qıyndyqty sabyrǵa jeńdirgen adam Allanyń razylyǵy men raqymyna ıe bolady.

Elimizde bolyp jatqan ýaqytsha synaqty áýeli Allanyń járdemimen, ımanymyz ben birligimizdiń arqasynda jeńip shyǵatynymyzǵa kóbirek úmit artaıyq.  

Qurmetti otandastar!

Naýryz meıramy qutty bolsyn! Jaratýshy Jabbar Iemiz barshańyzdyń januıańyzǵa jar bolǵaı! Merekede aıtylǵan bata-tilek, árbir jaqsy sózimiz qabyl bolsyn.

Rabbymyz elimiz ben jerimizdi túrli tabıǵı apat pen indetten saqtasyn. Halqymyzǵa amandyq, jurtymyzǵa tynyshtyq násip etkeı.

Denimiz qýatty, ár kúnimiz shýaqty bolǵaı! Ámın!  

Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı