Bas múftı Mysyr elshisimen kezdesti (FOTO)

Búgin elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly Egıpet Arab Respýblıkasynyń Qazaqstandaǵy Tótenshe jáne Ókiletti Elshisi Manal Ehııa ál-Shınnaýı hanymmen kezdesti.

Kezdesýde eki el arasyndaǵy tarıhı-mádenı hám rýhanı saladaǵy qarym-qatynas sóz boldy. Bas múftıdi jańa qyzmetimen quttyqtaǵan elshi ıgi nıetin jetkizdi.

«Sizdiń dinı saladaǵy joǵary laýazymdy qyzmetke saılanýyńyz múftııattyń 30 jyldyq mereıtoıymen sáıkes kelgen eken. Sizdi jáne ujymyńyzdy mereıtoılaryńyzben shyn júrekten quttyqtaımyn. Jańa qyzmettegi jańa bastamalaryńyzǵa bereke tileımin. Ózińiz bilesiz, ál-Ázhar ýnıversıteti men Qazaqstan musylmandary dinı basqarmasy arasynda áriptestik baılanys qalyptasqan. Biz osy ortaq kelisim aıasynda qazaqstandyq din qyzmetkerlerin Mysyrda bilim jetildirýine qoldaý kórsetýge árqashan daıynbyz. Osy jyly da qazaqstandyq stýdentterge grant bólindi. Bul baǵyttaǵy ıgi sharalar jyl saıyn júzege asa beredi» dep atap ótti Manal Ehııa Ál Shınnaýı hanym.

Qazaqstan men Mysyr halqyn onyń ortaq tarıhy men dástúrli dini baılanystyryp turǵanyn sóz etken Bas múftı Naýryzbaı qajy Taǵanuly:

«Bizdiń Sultan Beıbarys babamyz óz zamanynda Islam dinin órkendetýge súbeli úles qosty. Beıbarys babamyzdyń búgingi urpaǵy, ıaǵnı Táýelsiz Qazaqstannyń jastary Almatydaǵy «Nur-Múbárak» ýnıversıtetinde bilim alyp, el ıgiligi jolynda qyzmet etýde. Búginde «Nur-Múbárak» ýnıversıteti eki eldiń dinı saladaǵy altyn kópirine aınaldy. Bizdiń halqymyzda: «Eldestirmek – elshiden» degen naqyl sóz bar. Siz baýyrlas elderdiń baılanysyn arttyrýǵa yqpal etip kelesiz. Biz de óz tarapymyzdan ortaq maqsattardy júzege asyrýǵa árqashan daıynbyz», – dedi.

Kezdesý sońynda taraptar dinı aǵartý, bilim salasyndaǵy ózara áriptestik baılanysty arttyrýǵa ýaǵdalasty.