Bas múftı: «Munara» muraty
Qadirli oqyrman! Táýekelge bel býyp, tól gazetimizdi ashtyq. Qolyńyzda – «Munaranyń» qanatqaqty nómiri. Tileýles nıet tanytyp qoısańyz bolǵany.
Oıshyl Rýdakı: «Ómir – teńiz, júzem onda demeńiz, izgilikten jasalmasa kemeńiz», – demeı me? Maqsatymyz aıqyn: aqparat keńistigin izgilikke toltyrý. Ras, búginde adamnyń oı-pikirin bir arnaǵa burýda buqaralyq aqparat quralynyń mańyzy artyp keledi. Óıtkeni, bolǵan oqıǵaǵa árkim ár rakýrstan qaraıdy. Ony óz deńgeıinde qorytyp, saraptaıdy.
Alaıda, biz kóp jaǵdaıda aqparattyń bárin aqıqat dep qabyldap, ony ózgege tarata beredi ekenbiz. Al Alla Taǵala Quranda «Hýjýrat» súresinde bireý habar ákelse, ony anyqtaýdy, áıtpese bir elge kesirimiz tıip ketetinin eskertken. Bul aıat áýeli ár nárseniń anyq-qanyǵyn bilip alýdy úıretedi. «Munara» obektıvti aqparat taratýmen qatar, salt-dástúr, tarıh, bilim, medıtsına, t.b. salalar boıynsha ǵalymdardyń izdenisterin, zertteý maqalalaryn turaqty túrde jarııalaıdy. Óıtkeni, Islam qulshylyq pen tirshilikti úılestire otyryp ómir súrýge úndeıdi.
Biz ıman uǵymyn «uıat bolady, obal bolady, saýap bolady» degen biraýyz sózge syıdyra bilgen halyqpyz. Islam qundylyqtaryn qazaqy tanym-túsinik aıasynda nasıhattaý, birlik pen izgilikti tý etetin, eldiń erteńine eleńdeıtin er-azamattardyń patrıottyq sezimin oıatý – «Munara»-nyń basty muraty.
Asyl dinimiz adamdy ótkennen ónege alýǵa, búginmen ómir súrýge, bolashaqqa jospar qurýǵa shaqyrady. Islam – órkenıet dini. Ol eshqashan kertartpalyqqa jol bermeıdi. Quran – ár adam balasynyń bilim alyp, izdenýine jol ashatyn, nadandyqtan, zulymdyqtan qashyq bolýǵa úıretetin, kerisinshe ilim men órkenıet jolyna bastaıtyn Haq kitap. Islam – eshqashan ǵasyr sońynda qalmaıtyn, kerisinshe ǵasyrdy, zamandy alǵa jeteleıtin din. Tól gazetimizdiń ustanymy osy: jastardyń sanasyna sáýle shashý, rýhanı tanym kókjıegin keńeıtý.
«Munara» osy baǵytta óz oqyrmanyna qundy dúnıeler usynbaq. Oqyńyz, oı túıińiz!
Igi nıetpen,Serikbaı qajy ORAZ,
Qazaqstan musylmandary dinı basqarmasynyń tóraǵasy, Bas múftı
