Bas múftı medrese dırektoryn qabyldady (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly «Úshqońyr» medrese-kolledjiniń dırektory Abzal Ámirovty qabyldady. Kezdesýge QMDB Apparat basshysy Ǵylymbek Májıev, Dinı bilim jáne kadr daıarlaý bóliminiń meńgerýshisi Beıbit Myrzageldıev qatysty.

Basqosýda medrese dırektory Bas múftıge dinı oqý ordasynyń aǵymdaǵy jumys esebin baıandady. Sonymen qatar ǵylymı jobalarmen aınalysyp jatqan shákirtterdiń jetistikteri týraly áńgimelep berdi.

Sapaly dinı kadr daıarlaýǵa asa mán berý qajettigine aıryqsha toqtalǵan Naýryzbaı qajy Taǵanuly: «Medreseniń jumys baǵyty tek shákirt tárbıeleýmen shektelmeý kerek. Bizdiń maqsatymyz – sapaly kadr daıarlap, barlyq meshitti tolyqtaı din qyzmetkerimen qamtamasyz etý. Shákirtterdi qyzmetke bólý isine asqan jaýapkershilikpen qarańyz. Osy baǵyttaǵy sharalardy Dinı bilim jáne kadr daıarlaý bólimimen birlese júzege asyryńyz. Qaı óńirge qansha maman qajet? Bul másele boıynsha arnaıy monıtorıng júrgizilsin», – dedi Bas múftı Naýryzbaı qajy Taǵanuly.

Kezdesý barysynda QMDB Tóraǵasy medrese-kolledj jumystaryna qoldaý kórsetip, janashyrlyq tanytyp kele jatqan «Qoja Ahmet Iasaýı bilim jáne parasat» qoǵamdyq qorynyń dırektory Nurjan Janqaraevqa alǵysyn bildirdi.

Basqosý sońynda Bas múftı medrese dırektoryna naqty tapsyrmalar berdi.