Bas múftı Máskeýde bastalǵan Halyqaralyq konferentsııaǵa qatysýda (FOTO)

Qazaqstan musylmandary dinı basqarmasynyń tóraǵasy Serikbaı qajy Oraz, Birinshi naıb múftı, Nur-Sultan qalasynyń Bas ımamy Naýryzbaı qajy Taǵanuly Máskeý qalasynda bastalǵan «Islam jahandyq álemde: Musylman mırasy jáne mádenıetaralyq dıalog» atty halyqaralyq konferentsııaǵa qatysýda.

Reseı Federatsııasy musylmandary dinı basqarmasynyń uıymdastyrýymen óz jumysyn bastaǵan konferentsııa Máskeý Sobor meshitiniń 115, Reseı Federatsııasy musylmandary dinı basqarmasynyń qurylǵanyna 25 jyl, Máskeý Islam ınstıtýtyna 20 jyl mereıtoıy aıasynda ótýde.

Ashylý saltanatynda sóz alǵan Bas múftı Serikbaı Satybaldyuly:

«Qazaq halqynda: «Dosty tańdaısyń, al kórshini Qudaı qosady», – degen naqyl sóz bar. Reseı – Qudaı qosqan kórshimiz. Reseıde turatyn mıllıondaǵan musylman úmbetin úlken tarıhı oqıǵalar kútip tur. Ol – Máskeý Sobor meshitiniń 115, Reseı Federatsııasy musylmandary dinı basqarmasynyń qurylǵanyna 25 jyl, Máskeý Islam ınstıtýtyna 20 jyl. Sizderdi osynaý aıtýly merekelerińizben quttyqtaımyn. Alla Taǵala barshamyzdy osyndaı berekeli basqosýlarda kezdestirip, ıgi de izgi istiń basy-qasynda bolýdy jazǵaı! Jaratýshy Iemiz Quranda buıyrǵandaı, jaqsy iste, taqýalyqta bir-birimizge kómekshi bolýdy násip etkeı!» – dep atap ótti.

Konferentsııa josparyna saı, QMDB tóraǵasynyń Birinshi orynbasary Naýryzbaı qajy Taǵanuly elimizde ár úsh jyl saıyn ótetin Álemdik jáne dástúrli din kóshbasshylarynyń sezi jaıly, dinaralyq dıalogtyń máni men maqsaty týraly baıandama jasaıdy.

Konferentsııa jumysy erteń de jalǵasady.