Bas múftı Máshhúr Júsiptiń murajaıy men kesenesin aralady (FOTO)
Pavlodar oblysyna jumys saparymen barǵan Bas múftı Serikbaı qajy Oraz oıshyl, ǵulama Máshhúr Júsiptiń kesenesinde bolyp, duǵa jasap, Quran baǵyshtady. Sonymen qatar, QMDB tóraǵasy Serikbaı Satybaldyuly Máshhúr babamyz jatqan kesenede ashylǵan «Eskeldi» mádenı-qonaqúı keshenindegi Máshhúr Júsip Kópeıulynyń murajaıyn aralady.
Oblys ákimi Bolat Baqaýov oıshyl ǵalymnyń rýhanı murasyn nasıhattaý baǵytynda atqarylyp jatqan jumystarmen tanystyrdy. Bas múftı murajaıdaǵy arnaıy kitapshaǵa Máshhúr Júsiptiń mol murasy jaıly oı-pikirin jazyp, qoltańbasyn qaldyrdy.
Máshhúr Júsip Kópeev jáne onyń baı ádebı murasy qazaq halqynyń rýhanı qazynasy ekenin aıtqan Serikbaı qajy Oraz ǵulamanyń shyǵarmalaryn aǵylshyn, orys tilderine aýdaryp, bastyrýdyń mańyzdylyǵyn atap ótti.
On bes jasyna deıin medresede bilim alyp, musylmansha hat tanyǵan Máshhúr Júsip (1858-1931) Qaraótkel, Atbasar, Qarajar mańyn jaılaıtyn Altaı-Qýandyq, Toqa elderin aralap, halyq qazynasy – aýyz ádebeti úlgilerin jınapty. At minip, aýyl aralaǵan balań jigit qanjyǵasyna qaǵaz toly qorjynyn bókterip ap búkil jaz, odan kúz boıyna Soltústik óńirin sharlaıdy, kóp jaılardyń kýási bolady. Halyqtyń aýyz ádebıetin jınaýǵa degen áýesqoılyǵyn birte-birte ómirlik maqsat-muratyna aınaldyrǵan Máshhúr Júsip el arasynan óziniń bala kúngi estigen ertegilerin, qıssa-jyrlaryn, jańyltpashtaryn, jumbaqtaryn qaǵaz betine túsiredi.
