Bas múftı maqtaaraldyq aǵaıynǵa kómek kólemin ulǵaıtýdy tapsyrdy (FOTO)
Búgin elordada Bas múftı Naýryzbaı qajy Taǵanulynyń tóraǵalyǵymen arnaıy jınalys ótti. Jınalysqa naıb múftı Ershat qajy Ońǵarov, QMDB Apparat basshysy Ǵylymbek Májıev jáne bólim meńgerýshileri qatysty.
Májiliste qasıetti Ramazan aıynda atqarylyp jatqan qaıyrymdylyq sharalardyń josparǵa saı júzege asýy pysyqtaldy. Sonymen qatar Bas múftı Naýryzbaı qajy Taǵanuly sý apatynan zardap shekken Túrkistan oblysy Maqtaaral aýdanyndaǵy aǵaıyndarǵa kórsetilip jatqan kómek kólemin ulǵaıtýdy tapsyrdy.
«Halqymyzdyń saltynda jylý jınaý, asar jasaý syndy ıgi dástúr bar. Osy dástúrdi jańǵyrtyp, Maqtaaral aýdanyndaǵy jerlesterimizge kóbirek kómek kórsetýimiz kerek. Qaıyrymdylyq sharasyna ózge aımaqtaǵy ımamdarmen qosa «Zeket» qorynyń ókilderi de atsalyssyn», - dedi Bas múftı.
Jınalys sońynda Naýryzbaı qajy Taǵanuly «Zeket» qorynyń dırektory Talǵat Omarovqa, sonymen qatar bólim meńgerýshilerine naqty tapsyrmalar berdi.
