Bas múftı kópbalaly analarǵa syı jasap, stýdentke tegin oqý grantyn tabystady (FOTO)

Bas múftı Serikbaı qajy Oraz "Nur Múbərak" ýnıversıtetiniń stýdentterimen kezdesip, Islamdaǵy əıel mərtebesi jaıly ýaǵyz aıtty. 

"Adamzat ómirindegi úlken amanatty arqalap júrgen qurmetti analar, ápke-qaryndastar barshańyzdy halyqaralyq kóktem merekesimen quttyqtaımyz. Sizderdiń oryndaryńyz jaıly Islam dinindegi derekterdiń ózi kóp maǵlumat beredi. Adamzat tarıhyndaǵy ardaqty 4 anamyzdyń jánnatpen súıinshilenýi, paıǵambardy dúnıege ákelgen Márııam anamyzdyń atymen súre túsýi, tolyqtaı bir súreniń áıelderge arnalyp, mıras, muragerlik, t.b. quqyqtaryn qamtýy sizderdiń qoǵam ómirindegi oryndaryńyzdy kórsetedi", — dep júrekjardy lebizin bildirdi Serikbaı qajy Oraz.

Kelgen qurmetti qonaqtarǵa alǵysyn bildirip, sóz alǵan "Nur-Múbarak" rektory, professor Mýhammad ál-Jındı jıylǵan búkil jaýlyqty qyz-kelinshekterdi merekelerimen quttyqtap, álemniń bir bólshegi retinde Mysyr elinde de halyqaralyq áıelder merekesi atalyp ótetinine toqtaldy. 

Sondaı-aq, Almatydaǵy Mysyr mádenıet pen bilim isi jónindegi ortalyq dırektory Randa Mahmýd Rızk hanym da izgi lebizimen qosa ýnıversıtettegi birneshe úzdik hanymdarǵa syı-syıapatyn tabys etti.

Merekeniń sánin Bas múftı Serikbaı qajy Orazdyń kópbalaly birneshe anaǵa kir jýǵysh, tigin mashınalary, sondaı-aq ýnıversıtette bilim alýshy kóp balaly otbasynda ósken 1 kýrs stýdenti Aıana Shoraǵa bilim grantyn tabys etýi asha tústi. Bas múftı atyndaǵy grant 4 kýrs boıy tólenbek. Aldaǵy ýaqytta ýnıversıtettiń úzdik  stýdentterine osyndaı granttar kóbeıtý de josparda bar.