BAS MÚFTI HALYQARALYQ KONFERENTsIIaDA BAIaNDAMA JASADY
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Ázerbaıjan Respýblıkasyna barǵan saparynda ázerbaıjandyq oıshyl, kórnekti ǵalym ári rýhanı ustaz sheıh Seııd Iahııa Bakývıdiń murasyna arnalǵan halyqaralyq ǵylymı-praktıkalyq konferentsııaǵa qatysyp, arnaıy baıandama jasady.
«Túrki dúnıesiniń kórnekti ǵulamasy Qoja Ahmet Iasaýı hıkmetterinde adamnyń ishki jan dúnıesin tazartý, nápsini tárbıeleý, Allaǵa degen mahabbat pen adamǵa degen qurmet máselelerin keńinen jyrlady. Bul turǵyda Iasaýı men Bakývıdiń rýhanı murasynda mańyzdy úndestik bar. Ekeýi de adamnyń kemeldigin syrtqy dúnıemen ǵana ólshemeıdi. Adamnyń shynaıy bıiktigi onyń júreginiń tazalyǵymen, mineziniń kórkemdigimen jáne Jaratýshyǵa degen yqylasymen aıqyndalady.
Qazaq pen ázerbaıjan halyqtaryn tek tildik nemese tarıhı jaqyndyq qana emes, ortaq rýhanı qundylyqtar da baılanystyrady. Ázerbaıjan topyraǵy Nızamı Gánjaýı, Seııd Iahııa Bakývı sekildi tulǵalardy dúnıege ákelgen qasıetti meken. Qazaq dalasy da ál-Farabı, Qoja Ahmet Iasaýı, Abaı sııaqty ǵulamalarymen adamzat órkenıetine ólsheýsiz úles qosty.
Olardyń barlyǵyn bir arnaǵa toǵystyratyn ortaq murat bar. Ol – adamdy kemeldikke jetkizý arqyly qoǵamdy izgilendirý. Bizdiń babalarymyzdyń rýhanı murasy bir-birinen alshaq emes. Kerisinshe, olar bir-birin tolyqtyryp, túrki-musylman órkenıetiniń tutas rýhanı beınesin qalyptastyrdy» dep atap ótti QMDB Tóraǵasy Naýryzbaı qajy Taǵanuly.
Aıta ketsek, konferentsııa jumysyna qatysqan Túrkııa, Ázerbaıjan, Ózbekstan, Qyrǵyzstan, Túrkimenstan Respýblıkalarynyń múftıleri de Bakývı murasy jaıly baıandama jasady.
