BAS MÚFTI HALYQARALYQ ǴYLYMI-TÁJIRIBELIK KONFERENTsIIaǴA QATYSÝDA
Búgin Almaty qalasynda «Nur-Múbarak» Egıpet ıslam mádenıeti ýnıversıtetiniń 25 jyldyq mereıtoıyna arnalǵan «Qazaqstandaǵy ıslam órkenıetiniń dástúri: ótkeni, búgini» atty HHHII halyqaralyq ǵylymı-tájirıbelik konferentsııa bastaldy.
Halyqaralyq jıynǵa Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly qatysýda.
«Nur-Múbarak» Egıpet ıslam mádenıeti ýnıversıtetinde uıymdastyrylǵan konferentsııa «Qazaqstandaǵy dástúrli ıslam: ǵylymı-tájirıbelik negizderi men damytý joldary» atty baǵdarlamalyq-nysanaly ǵylymı joba aıasynda ótýde.
Konferentsııa baǵdarlamasynda ýnıversıtet rektory Mýhammad Ýardanı Abdý ar-Rodyıdiń, Ózbekstan jáne Qyrǵyzstan musylmandary dinı basqarmalary ókilderiniń, sheteldik joǵary oqý oryndary men ǵylymı mekemeler ókilderiniń quttyqtaý sózderi qarastyrylǵan.
Jıyn aıasynda professor Shamshádın Kerim atalǵan ǵylymı jobanyń nátıjeleri men qoldanys aıasy týraly baıandama usynady. Sondaı-aq Qazaqstan Respýblıkasy Ǵylym jáne joǵary bilim mınıstrligi Ǵylym komıtetiniń qoldaýymen júzege asyrylyp jatqan joba aıasynda ázirlengen ǵylymı basylymdar tanystyrylady.
Konferentsııanyń sektsııalyq otyrystarynda Qazaqstandaǵy ıslam órkenıetiniń tarıhı ortalyqtary, Iasaýı murasy, ulttyq-mádenı biregeıliktiń qalyptasýyndaǵy ıslamnyń róli, dástúrli dinı tanym, rýhanı qaýipsizdik jáne din men dástúr sabaqtastyǵy máseleleri qarastyrylady.
