Bas múftı Halyqaralyq ǵylymı konferentsııaǵa qatysty (FOTO)
Qazaqstan musylmandary dinı basqarmasynyń tóraǵasy Serikbaı qajy Oraz Shymkent qalasynda ótken «Uly dalanyń batyrlary – aq týly sirgeli Jabaı batyr» atty halyqaralyq ǵylymı konferentsııaǵa qatysyp, baıandama jasady.
«Alashtyń ardaqty uldarynyń biri Álıhan Bókeıhan tujyrymdy bir sózinde: «Shyńǵys han dúnıeni aldy, artynda túk belgi qalǵan joq. Aqsaq Temir dúnıeni almasa da artynda Samarqand, meshit, medresedeı belgi qaldy...» degen eken. Bul sózdiń astarynan adam balasy bul ómirde izgilikti isimen artynan iz qaldyrýy tıis degen uǵymdy uǵamyz. Qudaıǵa shúkir, kıeli qazaq topyraǵynda aty kúlli álemge máshhúr tulǵalar men din ǵulamalary dúnıege keldi. Ýaqyt ótken saıyn olardyń tulǵasy men artyna qaldyrǵan rýhanı murasynyń quny artyp, óz dárejesinde baǵalanyp keledi.
Arǵy babalarymyzdy aýyzǵa alǵanda áýeli Ábý Nasyr ál-Farabıdi aıtamyz, sodan keıin Ázireti Sultan atanǵan Qoja Ahmet Iasaýı, bergi tarıhymyzda Tóle bı, Bekasyl áýlıe, Jabaı ata, Qurtqa táýipterdiń tulǵasy eske túsedi. Osy rette Jabaı atanyń ónegeli ómiri men tulǵasyn pash etý maqsatynda tarıhshylarmen birigip, jańa zertteý jumysyn bastaýdy usynamyn. Ekinshiden, áýlıe, batyr Jabaıdyń ǵıbratty ǵumyry jaıly Almatydaǵy «Nur Múbarak» ýnıversıteti men elimizdegi 9 medresede tulǵa jaıly tálimdik dárister ótkizý mańyzdy dep esepteımin. Úshinshiden, «kıno – ónerdiń ishindegi eń ozyǵy» degendeı, Jabaı batyr týraly kórkem fılm túsirýdiń mańyz úlken ekenin atap ótkim keledi. Bul týyndy jastardyń sanasyna patrıottyq sezimderdi sińirip, ımandylyqqa baýlıtyn ıgi telejoba bolar edi», – dep atap ótti Bas múftı Serikbaı qajy Satybaldyuly.
M.Áýezov atyndaǵy Ońtústik Qazaqstan Memlekettik ýnıversıtetinde ótken halyqaralyq jıynǵa alys-jaqynnan kelgen ǵalymdar, elimizdiń zııaly qaýym ókilderi, belgili ǵalymdar men kórnekti jazýshylar, sonymen qatar Jabaı batyrdyń urpaqtary qatysty.
