Bas múftı Halyq qaharmanymen suhbattasty (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Halyq qaharmany, Májilis depýtaty Baqytjan Ertaevpen kezdesti.

Bas múftıdi jańa qyzmetimen quttyqtaǵan B.Ertaıuly: «Talaı jyldan beri din qyzmetinde kele jatqan azamatsyz. Qaıratkerligińiz, uıymdastyrý-úılestirý syndy qabiletińizben elge tanyldyńyz. Mine, Bas múftı qyzmetine saılandyńyz. Bári baıandy bolsyn! Allaǵa shúkir, dinimiz damyp, jamaǵatymyz kóbeıip keledi. Endigi maqsat – din isindegi sharýany dóńgeletip, tııanaqty jumys isteý. Tájirıbeńiz ben bilimińizdi eldiń dinı saýatyn ashýǵa jumsaı berińiz. Biz de osy eldiń azamaty, ata dinimizdiń janashyry retinde árqashan qoldaý kórsetýge daıynbyz» degen aqjarma tilegin jetkizdi.

Kezdesýde jastardy jat aǵymnyń teris ıdeologııasynan saqtandyrý, «Jeti rýhanı qazyq» qujatynda jazylǵan otanshyldyq, ádildik, birlik, bilimdilik syndy qundylyqtardy halyqqa keńinen nasıhattaý qajettigi sóz boldy.

Halyq qaharmany Bas múftıge batasyn berip, ıyǵyna shapan japty.