Bas múftı: «Karantın kezinde izgi isterimizdi kóbeıteıik»

Qazaqstan musylmandary dinı basqarmasynyń tóraǵasy Naýryzbaı qajy Taǵanuly «Habar 24» arnasyndaǵy «Suhbat» baǵdarlamasynda osylaı dedi.

«Karantın kezinde sabyr saqtap, bul ýaqytty jaqsylyqpen ótkizýge tyrysqanymyz abzal. Buryn kúıbeń tirlikpen qoly tımeı júrgen kóptegen ata-ana qazir ul-qyzdarynyń qasynda. Birge qulshylyq jasap jatqandar da bar. Birge kitap oqyp, ýaqytty tıimdi paıdalanýda. Al nasıhat tyńdaımyn degen jandar úshin de múmkindik mol. Biz qazir onlaın rejımde ýaǵyz aıtyp, táýlik boıy jumys isteıtin call-center arqyly jamaǵattyń saýalyna jaýap berýdemiz.

Aqparat ortalyǵynyń (call-center) nómiri – 8 (7172) 33-30-30. Ortalyqta din salasynyń bilikti mamandary táýlik boıy qazaq jáne orys tilindegi suraqtarǵa jaýap beredi. Synaq sátin saýapqa aınaldyra bilýdiń ózi bir ǵanıbet. Syndarly sátte izgi isterimizdi kóbeıtip, saýap alýǵa tyrysaıyq. Alla Taǵala bul synaqty ımanymyz ben birligimizdiń arqasynda jeńip shyǵýdy násip etkeı», - dep atap ótti Naýryzbaı qajy Taǵanuly.